ბრაზილიას ბელგიასთან კაზემირო ვერ დაეხმარება

ბრაზილიის ნაკრებმა მერვედფინალში მექსიკას ანგარიშით, 2-0 სძლია და მეოთხედფინალში ბელგიის წინააღმდეგ ითამაშებს.

საგულისხმოა, რომ ამ მატჩში “სელესაოს” ძირითადი შემადგენლობის ერთი ფეხბურთელი, კაზემირო ვერ დაეხმარება. საყრდენმა ნახევარმცველმა მექსიკელებთან დაპირისპირების დროს, ჯონათან დოს სანტოსის წინააღმდეგ იუხეშა და ტურნირზე მეორე ყვითელი ბარათი მიიღო. პირველი გაფრთხილება მას შვეიცარიის ნაკრებთან ჰქონდა. დიდი ალბათობით, მას “მანჩესტერ სიტის” ნახევარმცველი, ფერნანდინიო ჩაანაცვლებს.

გეტყვით, რომ ფილიპე კოუტინიოსა და ნეიმარს, ბელგიასთან გაფრთხილებების მიღების შემთხვევაში, თუ ბრაზილია შემდეგ ეტაპზე გავა, ნახევარფინალური მატჩის გამოტოვება მოუწევთ.

ლათინოამერიკელები “წითელ ეშმაკებთან” დაპირისპირებას ექვს ივლისს გამართავენ. ეს მატჩი თბილისის დროით 22:00 საათზე დაიწყება.