ბუფონი: “მინდა, რომ 2018 წლის მსოფლიოს ჩემპიონატზე ვითამაშო”
ტურინის “იუვენტუსისა” და იტალიის ნაკრების კიპერმა ჯანლუიჯი ბუფონმა იმ დროზე ისაუბრა, როდესაც, მისი თქმით, “ბებერი სინიორა” ყველაზე თვალსასეიროდ თამაშობდა. გარდა ამისა, ვეტერანმა იტალიელმა მეკარემ სამომავლო გეგმებზეც გააკეთა კომენტარი.
“იუვენტუსში” ჩემი ყოფნის პერიოდში გუნდი ყველაზე კარგად 2002/2003 წლების სეზონში თამაშობდა, როდესაც მას მარჩელო ლიპი თავკაცობდა. ჩვენ ჩემპიონთა ლიგის ფინალში გავედით და პენალტების სერიაში დავმარცხდით. მაშინდელი “იუვენტუსი” ლამაზად და ეფექტიანად თამაშობდა. თუ შემადგენლობების მხრიოვ ვიმსჯელებთ, მაშინ საუკეთესო გუნდი ფაბიო კაპელოს თავკაცობის პერიოდში გვყავდა.
როდისთვის მინდა ლურსმანზე ბუცების დაკიდვა? მინდა, რომ კარიერა თავაწეულმა დავასრულო. ჩემი ცხოვრების მთავარი კრედო ყოველთვის იყო ის, რომ ჩემ წინ მდგარი ნებისმიერი კაცისთვის თვალის გასწორება შემეძლოს. ფეხბურთელის ამპლუაში ჩემი ბოლო ამოცანა 40 წლის ასაკში მსოფლიოს ჩემპიონატზე თამაშია”, – ბუფონის კომენტარი Football Italia-მ გამოაქვეყნა.
