ბუფონი: “სანამ ეს მისწრაფება და სურვილი მექნება, ვითამაშებ”

ტურინის “იუვენტუსისა” და იტალიის ნაკრების კიპერმა ჯანლუიჯი ბუფონმა 2016 წლის ევროპის ჩემპიონატზე “სკუადრა აძურას” მიზნების შესახებ ისაუბრა. 37 წლის მეკარემ ისიც აღნიშნა, რომ კარიერის დასრულებას ჯერ არ აპირებს.

“დღეიდან უნდა დავადგეთ იმ პროგრესის გზას, რომელიც თავის კულმინაციას ევრო-2016-ზე მიაღწევს. ეს იმას არ ნიშნავს, რომ ევროპის ჩემპიონატს აუცილებლად მოვიგებთ, თუმცა რაც შეგვეძლება, ყველაფერი უნდა გავიღოთ.

კი ბატონო, გარკვეულ ასაკს მივაღწიე, მაგრამ ჯერ კიდევ მაქვს მებრძოლი სული. არ ვიცი, როდემდე ვითამაშებ. სანამ ეს მისწრაფება და სურვილი მექნება და სანამ ფიზიკურადაც მზად ვიქნები, მანამდე ვითამაშებ. საკუთარ თავს არანაირ შეზღუდვას არ ვუწესებ. ასე რომ არ ვფიქრობდე, კარიერა უკვე დიდი ხნის დასრულებული მექნებოდა”, – ბუფონის კომენტარი Football Italia-მ გამოაქვეყნა.