ჩავიმ “ბაიერნთან” მატჩამდე პრესკონფერენცია გამართა

კატალონიის “ბარსელონას” მთავარი მწვრთნელი, ჩავი ერნანდესი, “ბაიერნთან” მატჩის წინ პრესასთან საუბრობს. როგორც იცით, ჯგუფური ეტაპის ბოლო ტურში გაირკვევა შეძლებს თუ არა “ბლაუგრანა” ჩემპიონთა ლიგის პლეი-ოფში გასვლას.

“როგორც ყველა ის ადამიანი, რომელიც ბოლომდე იბრძვის, მეც უარს ვამბობ დანებებაზე. იმედი გვაქვს, რომ შანსების შექმნას, მეტოქეზე დომინირებას და საბოლოო ჯამში გამარჯვებას შევძლებთ. მატჩის დასრულების შემდეგ ვისაუბროთ.

ჩვენ ვცდილობთ დავამტკიცოთ, რომ “ბარსელონა” ევროპის ნებისმიერ სხვა კლუბზე მაღლა დგას. ამისთვის კი ძალიან დიდი მუშაობა და მოთმინებაა საჭირო. ყველაფრის ერთ დღეში შეცვლა შეუძლებელია.

“ბაიერნი” მსოფლიოს ერთ-ერთი საუკეთესო კლუბია, მაგრამ ჩვენ საკუთარ თავზე ვართ დამოკიდებულები. გამარჯვების შემთხვევაში მომდევნო ეტაპზე გავალთ. ჩვენ ბოლომდე ვიბრძოლებთ,” – აცხადებს ჩავი.