დევდარიანი: „მარცხის მიუხედავად, მოთამაშეებს მადლობას ვუხდი“
საქართველოს 19-წლამდელთა ნაკრების მთავარმა მწვრთნელმა გიორგი დევდარიანმა ევროპის ჩემპიონატის ელიტრაუნდის პირველი მატჩი შეაფასა, რომელშიც მისი გუნდი ესპანელ თანატოლებთან ანგარიშით 1:4 დამარცხდა.
„ჩემთვის დამაწყნარებელია, რომ მეორე ტაიმში გუნდმა უკეთესად ითამაშა. გაჩნდება კითხვა, რატომ ვერ ვითამაშეთ ასე პირველ ნახევარში? ეს ვერც მე და ვერც ფეხბურთელებს ვერ გამოგვივიდოდა, გამომდინარე იქედან, რომ ესპანეთის ნაკრებს თითქმის ერთი წლის განამვლობაში არ უთანაშია. ბოლო დროს ამ გუნდმა მხოლოდ გერმანიასთან ითამაშა. პირველ ტაიმს დაზვერვითი ხასიათი ჰქონდა და უნდა გაგვეგო, როგორ ითამაშებდა მეტოქე. ამისთვის მეორე ნახევარში ცვლილებები უნდა გამოგვეყენებინა.
მეორე გოლის ეპიზოდში მეტოქეს გაუმართლა, თუმცა ჩვენი ფეხბურთელების სასახელოდ უნდა ითქვას, რომ ამის მიუხედავად, მეორე ტაიმში მათ გააზრებული ფეხბურთი აჩვენეს. ბოლო წუთებში კონცენტრაცია არ გვეყო. შესაძლოა, ეს გულშემატკივარს არ აინტერესებდეს და ის გუნდისგან მხოლოდ მოგებას ელოდება, მაგრამ ამას თავისი მიზეზი აქვს.
მქონდა გეგმა, რომელმაც დღეს არ გაამართლა. პირველ ტაიმში მეტოქის თამაშის შესწავლა და კონტრშეტევების მაქსიმალურად გაოყენება მსურდა. სამი მომენტი გვქონდა, თუმცა ტექნიკური წუნის გამო გოლის გატანა ვერ შევძელით.
საფეხბურთო კლუბ „საბურთალოს“ მადლობას ვუხდი, შემადგენლობაში მისი 11 აღზრდილი გვყავს. ამ კლუბმა სეზონის განმავლობაში მხოლოდ ოთხ მატჩში ითამაშა, დანარჩენ შეხვედრებს ფეხბურთ ნაკლებათ ჰქვიათ. პირველი ლიგის ტემპს და დინამიკას შენიშნავდით. შეადარეთ მათ ის მოთამაშეები, რომლებიც ესპანეთის წამყვან გუნდებში თამაშობენ და დღეს ჩვენ წინააღმდეგ გამოვიდნენ.
ფეხბურთელებს ამ მარხს ვერ დავაბრალებ, გულშემატკივარი არ ვარ და კარგად ვიცი, თუ რამ გამოიწვია ეს შედეგი. ჩვენი გუნდი ფიზიკურ მომზადებაში აშკარად მოიკოჭებს. ბოლო ორი გოლი სწორედ ამიტომ გავუშვით. როდესაც იღლები, შეცდომების რაოდენობა იმატებს. იგივეს რამდენიმე ფეხბურთელზე გეტყოდით, რომელთა გუნდები სეზონის მიმდინარეობისას დაიშალნენ. ასეთ პირობებში მადრიდის „რეალის“ მოთამაშეთა წინააღმდეგ გამოსვლა ძალიან რთულია.
ჩემს ფეხბურთელებს მეორე ტაიმში ნაჩვენები თამაშისთვის დიდ მადლობას ვუხდი. რამდენიმე შეცდომას თუ არ ჩავთვლით, მეორე ნახევარში გაცილებით უკეთესად ვითამაშეთ“, – განაცხადა დევდარიანმა.
