დღეს აკი ბაშო იწყება!
დღეს აკი ბაშო იწყება – წლის რიგით მე-5 სუპერტურნირი სუმოში.
აკი იაპონური სიტყვაა და ქართულად შემოდგომას ნიშნავს. და რადგან სექტემბერი შემოდგომის პირველი თვეა, იაპონელები მას შემოდგომის ბაშოს უწოდებენ. ჩვენ კი შეგვიძლია როგორც აკი ბაშოს, ასევე სექტემბრის ბაშოს სახელით მოვიხსენიოთ.
აკი ბაშო ტოკიოს რიოგოკუ კოკუგიკანის დარბაზში ტარდება, რომელიც იაპონური სუმოს მექად არის აღიარებული. სხვათა შორის, კოკუგიკანშივე იმართება წლის კიდევ ორი ბაშო, იანვრისა და მაისის.
ეს ტურნირი 2005 წლის სექტემბრის ბაშოს შემდეგ პირველი იქნება, რომელშიც მხოლოდ ერთი ქართველი სუმოისტი მიიღებს მონაწილეობას. სწორედ იმ დროიდან მოყოლებული ქართული სუმოს პიონერი, კოკკაი იაპონურ სუმოში ეულ სუმოისტად აღარ ყოფილა სამშობლოდან წარგზავნილი, რადგან ლევან ცაგურიას გაგამარუ შეუერთდა და თეიმურაზ ჯუღელმაც იაპონურ დოჰიოზე ხმაურიანად შეაბიჯა. გაგას სულ მალე ტოჩინოშინიც შეუერთდა და 2006 წლის მარტიდან 2012 წლის სექტემბრის ჩათვლით იაპონურ სუმოში 3 ქართველი სეკიტორი ერთდროულად გამოდიოდა. 1 წელი შესრულდება მალე, რაც კოკკაიმ მავაში “ლურსმანზე ჩამოკიდა” და აქტიური სპორტული კარიერა დაასრულა. მას მერე საქართველოს ღირსებას მხოლოდ გაგა და ტოჩი იცავენ. და აი 8 წლიანი პაუზის შემდეგ, ეს ბაშო იქნება პირველი, რომელშიც მხოლოდ 1 ქართველი იასპარეზებს. საქმე იმაშია, რომ ლევან გორგაძემ 2 თვის წინ, ივლისის ბაშოზე მძიმე ტრავმა მიიღო და სექტემბრის ბაშოს გამოტოვება სრულად მოუწევს. ლევანი ჯურიოს დივიზიონში დასავლეთის პირველ ნომრად არის განთესილი, თუმცა მხოლოდ პირობითად, რადგან ტრავმა ლევანს დოჰიოზე გასვლის საშუალებას არ აძლევს.
გაგამარუს რაც შეეხება, იგი კვლავაც უმაღლესი დივიზიონის უმძიმეს სეკიტორად რჩება (203 კგ.) და ამჯერად აღმოსავლეთის მე-9 მაეგაშირად იქნება განთესილი.
გაგას მეტოქე ბაშოს პირველ დღეს დასავლეთის მე-9 მაეგაშირა, იაპონელი კოტოიუკი იქნება, რომელიც 22 წლისაა და მხოლოდ მე-3 ბაშოს ატარებს მაკუუჩიში. გაგა და იაპონელი პირველად შეერკინებიან ერთმანეთს დოჰიოზე.
წარმატებული სტარტი ვუსურვოთ ქართველ გოლიათს!
