დღის მთავარი სატრანსფერო ამბები – 13 აგვისტო
დი მარიას “ბარსაში” უნდა
Marca-ს მიერ გავრცელებულ უახლეს ცნობებს თუ დავუეჯრებთ, “პარი სენ-ჟერმენის” არგენტინელ შემტევს, ანხელ დი მარიას ძალიან უნდა კარიერის “ბარსელონაში” გაგრძელება.
როგორც იცით, კატალონიელები ჯერაც ეძებენ ნეიმარის შემცვლელს. პოტენციურ კანდიდატებად კი დი მარიასთან ერთად ფილიპე კოუტინიოსა და უსმან დემბელეს განიხილავენ.
მარკო ასენსიო “არსენალში”?
ბრიტანულ პრესაში ვრცელდება ინფორმაცია, რომ მადრიდის “რეალის” ესპანელ შემტევს, მარკო ასენსიოსა და “არსენალს” შორის მოლაპარაკებები დაჩქარებული წესით მიმდინარეობს.
გეტყვით იმასაც, რომ ასენსიოს ტრანსფერით “მანჩესტერ იუნაიტედიცაა” დაინტერესებული. მარკოს კონტრაქტში კი მის გამოსასყიდ თანხად 72 მილიონი ფუნტია მითითებული.
კოუტინიოს ინსინიე შეცვლის?
იურგენ კლოპის “ლივერპული” მზადაა 60 მილიონი ფუნტი შესთავაზოს “ნაპოლის” ლორენცო ინსინიეს ტრანსფერის ნაცვლად, თუ მერსესაიდს ფილიპე კოუტინიო დატოვებს.
Daily Mirror იუწყება, რომ გერმანელს არ სურს გუნდში ისეთი ფეხბურთელის ყოლა, რომელსაც თვალი წასვლაზე უჭირავს და თანახმაა, კოუტინიო გაუშვას.
“მანჩესტერ იუნაიტედმა” “ტოტენჰემის” წინადადება უარყო
RMC-ს მიერ გავრცელებული ინფორმაციის მიხედვით, ლონდონის “ტოტენჰემის” ხელმძღვანელები “მანჩესტერ იუნაიტედის” ფრანგი შემტევის, ანტონი მარსიალის ტრანსფერით არიან დაინტერესებულები.
“მამლებმა” უკვე გაუკეთეს “წითელ ეშმაკებს” ოფიციალური შეთავაზება, მაგრამ როგორც ჩანს, ჟოზე მოურინიო “მილანის” სამიზნის, მარსიალის გაშვებას არ გეგმავს.
“ჩელსის” კოშტას წონა ადარდებს
ლონდონის “ჩელსის” ხელმძღვანელები შეწუხებულები არიან დიეგო კოშტას ახალი ცხოვრებით, რომელიც ამ დროისთვის ბრაზილიაში იმყოფება და დროს მეგობრებთან ერთად ატარებს.
საქმე იმაშია, რომ “არისტოკრატები” მის გაყიდვას გეგმავენ, მან კი ამ დროს ძალიან მოიმატა წონაში, რაც მას არასასურველ სამიზნედ ხდის.
