დღის მთავარი სატრანსფერო ამბები – 16 ივნისი
კონტე “ჩელსის” ტოვებს?
Sky Sports-ის ცნობით, ლონდონის “ჩელსის” მთავარი მწვრთნელი, ანტონიო კონტე სატრანსფერო ფანჯარაზე კლუბის ხელმძღვანელთა პასიურობით უკმაყოფილოა და კლუბის დატოვებაზე ფიქრობს.
კონტემ მისი ყოფილი კლუბი, “იუვენტუსიც” სოწრედ ამავე მიზეზით დატოვა, მის შემცვლელად კი ლონდონში ტომას ტუჰელს მოისაზრებენ, რომელმაც ზაფხულში დორტმუნდის “ბორუსია” მიატოვა.
დონარუმასთვის გაჩაღებულ ბრძოლაში ლიდერი “რეალია”
ჯანლუიჯი დონარუმამ 15 ივნისს ოფიციალურად დაადასტურა, რომ “მილანთან” კონტრაქტის გახანგრძლივებას არ აპირებს და იტალიურ კლუბს უახლოეს მომავალში დატოვებს.
ახალგაზრდა იტალიელი მეკარის გადაბირების სურვილს კი ევროპის რამდენიმე გრანდი გამოთქვამს, მათ შორის დაწინაურებულ პოზიციებში “რეალისა” და “პსჟ”-ს ხელმძღვანელები იმყოფებიან. Sky Sport Italia-ს ცნობით, ჯიჯიოს გადაბირებასთან ყველაზე ახლოს მადრიდული გრანდი იმყოფება.
პეპი კროოსს “სიტიში” იწვევს
“მანჩესტერ სიტის” მთავარი მწვრთნელი, პეპ გვარდიოლა მზადაა, მადრიდის “რეალთან” ტონი კროოსის ტრანსფერის თაობაზე წამოიწყოს მოლაპარაკებები.
Don Balon-ის ცნობით, “ბარსელონას” ყოფილმა თავკაცმა უკვე მიაღწია სიტყვიერ შეთანხმებას გერმანელი ფეხბურთელის წარმომადგენელთან და ახლა ჯერი “რეალზეა”.
A Bola: რონალდუ “რეალს” დატოვებს
პორტუგალიური პრესა იუწყება, რომ კრიშტიანუ რონალდუმ მადრიდული გრანდის დატოვების გადაწყვეტილება მიიღო, სადაც მან სამჯერ მოახერხა ევროპის ყველაზე პრესტიჟული საკლუბო ტურნირის მოგება და ამის შესახებ კლუბის პრეზიდენტსაც აცნობა.
A Bola-ს ცნობით, პორტუგალიელი სუპერვარსკვლავი გადასახადების დამალვაშია დადანაშაულებული და იძულებულია ესპანეთი დატოვოს.
კარასკოს ტრანსფერისთვის ერთმანეთს “ბაიერნი” და “არსენალი” ეცილებიან
მადრიდის “ატლეტიკოს” შემტევის, იანიკ ფერეირა კარასკოს გადაბირებით მიუნხენის “ბაიერნისა” და ლონდონის “არსენალის” ხელმძღვანელები არიან დაინტერესებულები.
calciomercato.com-ის ცნობით, “არსენალი” კარასკოში ალექსის სანჩესის შემცვლელს ხედავს, რომელიც ზაფხულში კლუბს აუცილებლად დატოვებს, “ბაიერნი” კი კარასკოზე სანჩესის ტრანსფერის ჩაშლის შემთხვევაში გადაერთვება.
