დღის მთავარი სატრანსფერო ამბები – 17 იანვარი
ეშლი იანგი “ინტერში” გადავიდა
“მანჩესტერ იუნაიტედის” მცველი ეშლი იანგი მილანის “ინტერში” გადავიდა. მხარეებს შორის 18-თვიანი შრომითი ხელშეკრულება გაფორმდა. ტრანსფერის ღირებულებამ ერთნახევარი მილიონი გირვანქა სტერლინგი შეადგინა.
შეგახსენებეთ, რომ ეშლი იანგი “მანჩესტერ იუნაიტედის” ღირსებას 2011 წლიდან იცავდა. მან მიმდინარე სეზონში ყველა ტურნირზე ერთად 18 მატჩი ჩაატარა, ერთი გოლი გაიტანა და ერთი შედეგიანი გადაცემა მიითვალა.
მუნიე “მანჩესტერ იუნაიტედში”?
Le Parisien-ის ცნობით, “პარი სენ-ჟერმენის” მარჯვენა მცველი, ტომას მუნიე, შესაძლოა, “მანჩესტერ იუნაიტედში” ვიხილოთ. ბელგიელ ფეხბურთელს პარიზულ კლუბთან კონტრაქტი ეწურება და სეზონის ბოლოს თავისუფალი აგენტი გახდება.
არტურო ვიდალი “ინტერში”?
იტალიურ მედიაში გავრცელებული ინფორმაციით, მილანის “ინტერი” ზამთრის სატრანსფერო ფანჯრის დროს “ბარსელონას” ნახევარმცველის, არტურო ვიდალის შეძენას შეეცდება.
ვიდალი ერნესტო ვალვერდეს ერთ-ერთი ფავორიტი ფეხბურთელი იყო, კიკე სეტიენის გუნდში მისვლის შემდეგ კი მისი მომავალი ჯერ-ჯერობით გაურკვეველია.
“არსენალი” და “ტოტენჰემი” აკეს ვარიანტს განიხილავენ
ბრიტანულ მედიაში გავრცელებული ინფორმაციით, ნათან აკეს მიმართ ინტერესს ლონდონური კლუბები – “არსენალი” და “ტოტენჰემი” იჩენენ.
24 წლის ჰოლანდიელ მცველს “ბორნმუთის” დატოვება სურს და შესაძლოა, ის ახალ კლუბში მალე ვიხილოთ.
ნოიერი ნიუბელის კონტრაქტის ერთ-ერთი პუნქტით უკმაყოფილოა
“შალკეს” მეკარე, ალექსანდერ ნიუბელი ზაფხულში “ბაიერნის” წევრი გახდება. როგორც გაირკვა, კონტრაქტის თანახმად, ნიუბელმა მომდევნო სეზონში “ბაიერნის” რიგებში მინიმუმ 15 მატჩი უნდა ჩაატაროს, ეს ინფორმაცია 23 წლის ფეხბურთელის აგენტმაც დაადასტურა.
“ფრანსს ფუტბოლის” ცნობით, ნიუბელის კონტრაქტის აღნიშნული პუნქტით უკმაყოფილოა მანუელ ნოიერი, რომელიც გუნდის პირველი მეკარეა. ის კლუბის სპორტულ დირექტორს ჰასან სალიჰამიჯიჩს შეხვდა და ამ საკითხზე ესაუბრა. “სანამ აქ ვარ, ყველა მატჩში უნდა ვითამაშო, არ აქვს მნიშვნელობა, რომელი ტურნირი იქნება ან ამხანაგური შეხვედრა”, – ასეთი რამ უთხრა ნოიერმა სალიჰამიჯიჩს.
იმ შემთხვევაში, თუ “ბაიერნის” ხელმძღვანელობა ნოიერთან ურთიერთობას ვერ დაალაგებს, მაშინ დიდი შანსია, 33 წლის მეკარე მალე ახალ კლუბში ვიხილოთ.
