დღის მთავარი სატრანსფერო ამბები – 2 სექტემბერი
მესიმ “სიტისთან” 700-მილიონიანი კონტრაქტი შეათანხმა
ბრიტანული გამოცემა Daily Record-ის ცნობით, ლიონელ მესი “მანჩესტერ სიტის” ფინანსურ საკითხებზე უკვე შეუთანხმდა.
“სიტიმ” 33 წლის სუპერვარსკვლავს წლიურად 140 მილიონი ევრო შესთავაზა, რაც იმას ნიშნავს, რომ მესი ხუთ წელში 700 მილიონს მიიღებს. ამ ხუთი წლიდან, არგენტინელი სამს “მანჩესტერ სიტიში” გაატარებს, რის შემდეგაც “ნიუ იორკ სიტიში” გადავა.
სუარესი “იუვენტუსს” უახლოვდება
Sky Sport Italia, Sportitalia, La Gazzetta dello Sport, და Corriere dello Sport ერთხმად ადასტურებენ ინფორმაციას, რომლის მიხედვითაც ლუის სუარესმა ტურინის “იუვენტუსთან” პირად შეთანხმებას მიაღწია.
როგორც იცით, “ბარსელონაში” რონალდ კუმანის მისვლის შემდეგ გუნდიდან წასვლის განკარგულება ბევრ ფეხბურთელს მისცეს და მათ შორის ერთ-ერთი ურუგვაელი შემტევი ლუის სუარესი გახლავთ.
იგუაინი ბექჰემის კლუბში ითამაშებს
ტურინში ლუის სუარესის გამოჩენა იმის ნიშანი გახლავთ, რომ “ბიანკონერიში” გონსალო იგუაინის დღეები დათვლილია.
იტალიური გამოცემების ცნობით, არგენტინელი ფეხბურთელი უახლოეს დღეებში მაიამიში ჩაფრინდება, სადაც დევიდ ბექჰემის კლუბ “ინტერ მაიამისთან” გააფორმებს ხელშეკრულებას.
“პარი სენ-ჟერმენი” ბელერინის ტრანსფერით აპირებს გაძლიერებას
ლონდონის “არსენალის” მცველი ჰექტორ ბელერინი “პარი სენ-ჟერმენის” ინტერესთა სფეროშია მოქცეულლი.
როგორც ცნობილი ხდება, საფრანგეთის ჩემპიონმა “მეთოფეებს” უკვე მიმართა ოფიციალური წინადადებით. “პარიზელები” ბელერინის ტრანსფერში 25 მილიონ ფუნტს იხდიან, რასაც, შესაძლოა, 5 მილიონი ფუნტი ბონუსების სახით დაემატოს.
ვიდალი “ინტერში” ითამაშებს
გავლენიანი იტალიელი სპორტული ჟურნალისტი ფაბრიციო რომანო ირწმუნება, რომ მილანის “ინტერმა” არტურო ვიდალთან პირად შეთანხმებას უკვე მიაღწია.
ამ დროისთვის ჩილელი ნახევარმცველის აგენტი ყველაფერს აკეთებს იმისათვის, რომ ვიდალს “ბარსელონა” თავისუფალი აგენტის სტატუსით დაატოვებინოს.
“ევერტონმა” ხამესის ტრანსფერი შეათანხმა
ბრიტანული Express-ის მიერ დადასტურებული ინფორმაციის მიხედვით, ხამეს როდრიგესი კარიერას “ევერტონის” რიგებში გააგრძელებს.
“ევერტონმა” უკვე მიაღწია “რეალის” ხელმძღვანელებთან შეთანხმებას. 29 წლის კოლუმბიელი “კამფეტებთან” სამწლიან კონტრაქტს გააფორმებს.
