დღის მთავარი სატრანსფერო ამბები – 27 აგვისტო
სანჩესი 400 000 ფუნტიან ხელფასს ითხოვს
ლონდონის “არსენალის” ჩილელი ლიდერი, ალექსის სანჩესი კლუბისგან 400 000-იან ხელფასს ითხოვს, წინააღმდეგ შემთხვევაში კი ის გუნდს დატოვებს.
შეგახსენებთ, რომ ალექსის სანჩესს, რომლის გადაბირების სურვილსაც “მანჩესტერ სიტი” გამოთქვამს, მიმდინარე კონტრაქტი ზუსტად 12 თვის შემდეგ ეწურება.
“არსენალი” ასენსიო ტრანსფერზე მუშაობს
ლონდონის “არსენალის” მთავარი მწვრთნელი, არსენ ვენგერი კლუბისგან მარკო ასენსიოს ტრასნფერს ითხოვს. ამ ინფორმაციას ბრიტანული Sunday Epress ადასტურებს.
წყაროს ცნობით, ფრანგი სპეციალისტი 21 წლის მარკო ასენსიოს რეგულარულ სათამაშო დროს პირდება, რისი გარანტიც მას მადრიდულ გრანდში ნამდვილად არ აქვს.
“ბარსელონა” კოუტინიოს ტრანსფერში დარწმუნებულია
ესპანური Sport-ის მიერ გავრცელებულ ინფორმაციას თუ დავუჯერებთ, კატალონიის “ბარსელონას” ხელმძღვანელები მერსესაიდის “ლივერპულის” ლიდერის, ფილიპე კოუტინიოს ტრანსფერში დარწმუნებულები არიან.
როგორც იცით, “კამპ ნოუზე” თამაში თავად ბრაზილიელი ფეხბურთელის ოცნებასაც წარმოადგენს, თუმცა “ლივერპული” მისი გაშვების კატეგორიული წინააღმდეგია.
“ევერტონი” “ჩელსისთვის” ვარდის წართმევას გეგმავს
მერსესაიდის “ევერტონის” ხელმძღვანელები “ლესტერ სიტის” 40-მილიონიანი შემტევის, ჯეიმი ვარდის დამატებას აპირებენ, რომლისთვისაც ლონდონის “ჩელსიც” იბრძვის. ამ ინფორმაციას Sunday Mirror-იც ადასტურებს.
დიდი ალბათობით, ვარდი არჩევანს “ევერტონზე” გააკეთებს, სადაც მას უფრო მეტ სათამაშო პრაქტიკას პირდებიან.
კილიანი გუნდს დაუბრუნდა – მბაპეს ტრანსფერი ჩაიშალა?
ლიგა 1-ის ეგიდით, “მარსელის” წინააღმდეგ გასამართი მატჩამდე “მონაკოს” რიგებში გასული სეზონის მთავარი აღმოჩენა, კილიან მბაპე დაბრუნდა, რომელსაც საკმაოდ აქტიურად აკავშირებენ “პარი სენ-ჟერმენში” გადასვლასთან.
როგორც იცით, “მონაკოს” მთავარმა მწვრთნელმა, ლეონარდო ჟარდიმმა მბაპეს ლიგა 1-ის ბოლო ორ მატჩში თამაშის უფლება არ მისცა, რადგანაც ის თამაშისთვის 100 პროცენტით მზად არ იყო (ფსიქოლოგიურად), დღეს კი ის კვლავ დაბრუნდა განაცხადში.
18 წლის ფეხბურთელი “მარსელთან” გასამართი მატჩის შემდეგ საფრანგეთის ნაკრებს უნდა შეუერთდეს, რაც მისი 150-მილიონიანი ტრანსფერის შანსებს ამცირებს.
