დღის მთავარი სატრანსფერო ამბები – 5 აგვისტო
კონტე აზარის “ბარსელონაში” გადასვლას გამორიცხავს
ლონდონის “ჩელსის” მთავარი მწვრთნელი, ანტონიო კონტე ედენ აზარის “ბარსელონაში” შესაძლო გადაბარგების ამბავს გამოეხმაურა.
“ჩვენ ფეხბურთელების ყიდვაზე ვფიქრობთ და არა – გაყიდვაზე”, – თქვა კონტემ.
ალექსის სანჩესი “მონაკოში”?
ბრიტანულ პრესაში გავრცელებული ინფორმაციის თანახმად, “მონაკო” ალექსის სანჩესის შესაძენად 45 მილიონ ფუნტ სტერლინგს ამზადებს.
“არსენალს” ჩილელი ფეხბურთელის გაყიდვა არ სურს, თუმცა ბევრი რამ თავად სანჩესის სურვილზე იქნება დამოკიდებული.
ბეილს “მანჩესტერ იუნაიტედში” სურს
Don Balon-ის ცნობით, გარეტ ბეილმა თანაგუნდელ ლუკა მოდრიჩს უთხრა, რომ მას ინგლისის პრემიერ ლიგაში დაბრუნება სურს. ცნობილია, რომ უელსელ ფეხბურთელს “იუნაიტედში” თამაში უნდა.
შეგახსენებთ, რომ ბეილის მიმართ ინტერესს მანჩესტერული კლუბი წლების განმავლობაში იჩენდა.
“ბორუსია” თანახმაა, დემბელე “ბარსელონაში”…
დორტმუნდის “ბორუსიას” ახალგაზრდა ვარსკვლავი, უსმან დემბელე ძალიან ახლოსაა “ბარსელონაში” გადასვლასთან. ამ ინფორმაციას ავტორიტეტული გერმანული გამოცემა, Bild ადასტურებს.
დღეს გავრცელებული ცნობების მიხედვით, კატალონიელებმა 20 წლის ფრანგი შემტევის სანაცვლოდ გერმანულ კლუბს 80 მილიონი ევრო შესთავაზეს მაგრამ უარი მიიღეს.
როგორც ცნობილი ხდება, “ბორუსიას” მკაცრად აქვს გადაწყვეტილი, რომ დემბელე 100 მილიონზე ნაკლებად არ გაყიდოს. კატალონიელები კი ამ თანხის გადახდას ნეიმარის ტრანსფერისგან მიღებული 222 მილიონი ევროს წყალობით აპირებენ.
გასული სეზონის 32 მატჩში დემბელემ 6 გოლისა და 12 საგოლე გადაცემის გაკეთება შეძლო და 2016/17 წლების სეზონის საუკეთესო ახალგაზრდა ფეხბურთელიც გახდა.
“ბარსელონა” ინიგო მარტინესს უმიზნებს
“რეალ სოსიედადის” ხელმძღვანელები ადასტურებენ ინფორმაციას გუნდის ესპანელი მცველის, ინიგო მარტინესის მიმართ “ბარსელონას” ინტერესის არსებობის შესახებ.
“ბარსელონა” უკვე დაგვიკავშირდა, რათა ინიგო მარტინესის გარშემო არსებული მდგომარეობა გაეგო. მაგრამ, ჯერჯერობით მათ ოფიციალური წინადადებით არ მოუმართავთ.
“რეალ სოსიედადს” მისი გაყიდვის არანაირი სურვილი არ აქვს. ინიგო მარტინესი ჩვენი გუნდისთვის შეუცვლელი ფიგურაა, ყველაფერს გავაკეთებთ მის შესანარჩუნებლად,” – აცხადებს “რეალ სოსიედადის” ერთ-ერთი მმართველი.
გეტყვით იმასაც, რომ ინიგოს კონტრაქტში მის გამოსასყიდ თანხად 32 მილიონი ევროა მითითებული.
