დღის მთავარი სატრანსფერო ამბები – 9 ივლისი
1.2 მილიონი კვირაში
El Chringuito-ს ცნობით, ერთ-ერთმა ჩინურმა კლუბმა გარეტ ბეილს კვირაში ხელფასის სახით 1.2 მილიონი ფუნტი შესთავაზა. ჯერ-ჯერობით ამ კლუბის სახელი უცნობია.
როგორც იცით, ბეილის “რეალიდან” წასვლის შესახებ პრესაში ხშირად იწერება, თუმცა სად გააგრძელებს კარიერას უელსელი, ჯერ გადაწყვეტილი არ არის.
პაკეტა “მილანის” დატოვებას არ გეგმავს
“მილანის” ნახევარმცველი, ლუკას პაკეტა პსჟ-სთან დაკავშირებულ ჭორებს გამოეხმაურა და განაცხადა, რომ ის “როსონერის” დაატოვებას არ გეგმავს.
ბრაზილიელმა ფეხბურთელმა Goal.Com-ს დაუდასტურა, რომ ამ ზაფხულში “მილანს” არ დატოვებს.
ჩიჩარიტო “ფიორენტინაში”?
“ვესტ ჰემის” თავდამსხმელი, ხავიერ ერნანდესი, შესაძლოა, სერია A-ში ვიხილოთ. გავრცელებული ინფორმაციით, მის მიმართ ინტერესს “ფიორენტინა” გამოთქვამს.
შეგახსენებთ, რომ ჩიჩარიტოს სხვადასხვა დროს “მანჩესტერ იუნაიტედში”, “რეალში” და “ლევერკუზენში” უთამაშია.
ნაინგოლანი ჩინურ კლუბებს სურთ
რამდენიმე ჩინურ კლუბს “ინტერის” ნახევარმცველის, რაჯა ნაინგოლანის შეძენა სურს, საუბარია “შანხაი შენგუასა” და “დალიანზე”. იტალიური მედიის ცნობით, კლუბები უახლოეს ხანებში ფეხბურთელს შეთავაზებას გაუგზავნიან.
ლეონარდომ ნეიმართან დაკავშირებით კომენტარი გააკეთა
“პარი სენ-ჟერმენის” სპორტულმა დირექტორმა, ლეონარდომ განაცხადა, რომ ნეიმარს გუნდის დატოვება იმ შემთხვევაში შეეძლება, თუ რომელიმე კლუბიდან ყველასათვის მისაღები შემოთავაზება იქნება.
“თუ ყველასათვის მისაღები შემოთავაზება იქნება, ნეიმარს “პარი სენ-ჟერმენის” დატოვება შეეძლება. თუმცა, ამჟამინდელი მდგომარეობით, არ ვიცით, ვის სურს მისი შეძენა ან რა თანხას იხდიან მასში. მსგავსი საკითხები, რა თქმა უნდა, ერთ დღეში არ წყდება.
ყველასათვის ნათელია, რომ ნეიმარს გუნდის დატოვება სურს, მაგრამ ეს ფეხბურთია, დღეს ერთ რამეს ამბობ, ხვალ – სხვას. საოცრებაა, მაგრამ ასეა. ყველამ ყველაფერი იცის, მაგრამ ერთი რა უნდა გვახსოვდეს: მას ჩვენთან კონტრაქტის ამოწურვამდე სამი წელი აქვს დარჩენილი და სანამ შემოთავაზებას არ მივიღებთ, მის ტრანსფერზე ვერ ვიფიქრებთ. პსჟ იმედს ამყარებს იმ მოთამაშეებზე, რომლებსაც გუნდში დარჩენა და რაღაც დიდის აშენება სურთ”, – ციტირებს ლეონარდოს სიტყვებს Goal.Com.
გავრცელებული ინფორმაციით, ნეიმარის შეძენა “ბარსელონასა” და მადრიდის “რეალს” სურთ.
