დრამატული მატჩი ბენდელაზე
საბურთალო-სამტრედია 3:2
თბილისი. ბენდელა
1:0 ხარაიშვილი (7), 2:0 მარგველაშვილი (39), 2:1 ცნობილაძე (57), 3:1 თებიძე (70სკ), 3:2 ცინცაძე (90)
საბურთალო: ქურდაძე (სანიკიძე 59), ნ.იაშვილი, თოთაძე, მარგველაშვილი, ჩაბრაძე, ალთუნაშვილი, ფანცულაია (კოხრეიძე 57), ხარაიშვილი, გოშთელიანი, დვალი (მამუჩაშვილი 57), საბანაძე
სამტრედია: თებიძე, სანდოხაძე (მარკოზაშვილი 46), მთივლიშვილი, შერგელაშვილი (ჯიქია 71), ცნობილაძე, დათუნაიშვილი, ენდელაძე, რაჟამაშვილი, ზივზივაძე, სიხარულიძე
გაძევება: მთივლიშვილი (74)
ყველაფერი ჩაიტია ამ მატჩმა: 5 გოლი, უამრავი საგოლე მომენტი, 8 ყვითელი და ერთი წითელი ბარათი, დაძაბულობა, ნერვიულობა…
მატჩი საბურთალოელთა შეტევებით დაიწყო და უკვე მეშვიდე წუთზე დვალის პასის შემდეგ მეკარესთან პირისპირ დარჩა ხარაიშვილი, რომელმაც თებიძეს ჯერ თავზე გადაუგდო ბურთი, შემდეგ კი კარში გადაგზავნა.
მასპინძლები ამის შემდეგაც მწვავედ უტევდნენ. მომენტი ჰქონდა საბანაძეს, თოთაძის ჯარიმა მეკარემ მოიგერია. შიგადაშიგ შეტევებს სამტრედიელებიც გამოურევდნენ, მაგრამ დასამახსოვრებელი მხოლოდ ერთი ნახევრად მომენტი იყო, როდესაც ენდელაძის დარტყმულს მცველები გადაეღობნენ.
მასპინძელთა შეტევებმა კი შედეგი 39–ე წუთზე გამოიღო, როდესაც კუთხურის შემდეგ სამტრედიელთა საჯარიმოში არეულობა შეიქმნა და ყველაზე ადრე სიტუაციაში მარგველაშვილი გაერკვა – მისი ზუსტი დარტყმის შემდეგ ანგარიში 2:0 გახდა.
მხოლოდ ამის შემდეგ გამოფხიზლდნენ იმერლები და ქურდაძეს ორი რთული ბურთის მოგერიება მოუხდა.
მეორე ტაიმის დასაწყისი სტუმრების იყო, ზივზივაძემ ორჯერ დარჩა მეკარესთან პირისპირ და მომენტები გაანიავა. თუმცა სამტრედიელთა აქტიურობამ შედეგი მაინც გამოიღო. კუთხურის შემდეგ ცნობილაძემ ბურთი თავით გადაგზავნა კარში.
სტუმრებმა გასათანაბრებლად გაიწიეს, თავის მხრივ „საბურთალოს“ კონტრშეტევებიც სახიფათო იტო. საბანაძემ ვერ შეირგო საჩუქარი, მარგველაშვილმა ახლოდან ვერ გაიტანა. ცნობილაძემაც დაინდო მასპინძლები, რასაც კუთხური მოჰყვა, ხოლო მის გათამაშებას მარკოზაშვილის დარტყმა და მეკარის შესანიშნავი რეაქცია.
70–ე წუთზე კი თებიძემ სტუმრები დააღალატა. საჯარიმოს გარეთ მყოფმა უწყინარ სიტუაციაში ბურთის მოშორების ნაცვლად გოშთელიანის მოტყუება განიზრახა, ეს კი გამოვიდა, მაგრამ შემდეგ იძულებული გახდა პასი საჯარიმოში მყოფი თანაგუნდელისთვის გადაეწოდებია, თუმცა ამის ნაცვლად პირდაპირ საკუთარ კარში გაგზავნა.
მალევე სტუმრები კაცნაკლულნი დარჩნენ: მთივლიშვილმა ჯერ უხეშობისთვის მიიღო ყვითელი ბარათი, რომელიც გააპროტესტა და ცხვირწინ მეორე ყვითელი აუფრიალეს.
„სამტრედია“ არ გატყდა, მომენტი დათუნაიშვილს ჰქონდა. შემდეგ ერთ შეტევაში ნახევარი „საბურთალო“ ურტამდა თებიძის კარში, მაგრამ ბურთი სასწაულებრივად არ შევიდა კარში. სამტრედიელი ზივზივაძე კიდევ ერთხელ დარჩა მეკარესთან პირისპირ, მაგრამ სანიკიძემ აუღო, დამატებაზე კი თავად ზივზივაძემ ააცილა კარს. საპასუხოდ ჩაბრაძემ წამოიწყო კარგი რეიდი და გოშტელიანი შესანიშნავ პოზიციაზე დატოვა, მაგრამ საბურთალოელს მეკარემ აჯობა.
90–ე წუთზე „სამტრედიამ“ ისევ სტანდარტულით იხეირა: ფლანგიდან ჩაწოდებული ჯარიმა ცინცაძემ გადაგზავნა კარში – 3:2.
მსაჯმა 4 წუთი დაამატა. იმერლებს ამ დროში გათანაბრებაც შეეძლოთ, მაგრამ სიხარულიძის დარტყმის შემდეგ შესანიშნავად ითამაშა სანიკიძემ და მასპინძლებს 3 ქულა მოუტანა.
ამ ტურში ყურადღებას იპყრობდა ბათუმის „დინამოსა“ და ქუთაისის „ტორპედოს“ მატჩი. ანგარიში სტუმრებმა გახსნეს. ქიმაძემ თავი მე-60 წუთზე გამოიჩინა. მასპინძლებმა წონასწორობა ათიოდე წუთში გოგიტიძის ზუსტი დარტყმის შემდეგ აღადგინეს.
საინტერესო მატჩს ველოდით გორში, სადაც „დილა“ „ცხინვალს“ მასპინძლობდა, მაგრამ გორელებმა შეხვედრას აზრი პირველივე ტაიმში დაუკარგეს, როდესაც მარცვალაძის დუბლისა და ნონიკაშვილის გოლით 3:0 დაწინაურდნენ. საბოლოოდ, მატჩი ასე დასრულდა.
პირველი 3 ქულა ჩაიწერა აქტივში ფოთის „კოლხეთმა“, რომელმაც ქებურია ერთადერთი გოლით დაამარცხა ქობულეთის „შუქურა“.
საჩხერის „ჩიხურამ” მუმლაძისა და კუჭუხიძის მიერ შესრულებულით დუბლით სტუმრად 4:1 მოუგო „ზუგდიდს”. ერთადერთი საპასუხო გოლი სამუშიამ პენალტით გაიტანა.
უგოლოდ დასრულდა თერჯოლის „საპოვნელასა“ და ბოლნისის „სიონის“ მატჩი.
სატურნირო ცხრილი:
1.დინამო (თბ) 4 4 0 0 16-2 12
2.დილა 4 3 1 0 8-1 10
3.ჩიხურა 4 3 0 1 8-2 9
4.სამტრედია 4 3 0 1 10-7 9
5.საბურთალო 4 3 0 1 6-7 9
6.დინამო (ბთ) 4 2 2 0 9-2 8
7.სიონი 4 2 2 0 4-1 8
8.ცხინვალი 4 2 0 2 9-8 6
9.ტორპედო 4 1 2 1 6-4 5
10.გურია 4 1 1 2 5-6 4
11.ლოკომოტივი 4 1 0 3 6-8 3
12.შუქურა 4 1 0 3 2-6 3
13.კოლხეთი 4 1 0 3 1-5 3
14.საპოვნელა 4 0 1 3 2-10 1
15.ზუგდიდი 4 0 1 3 3-15 1
16.მერანი 4 0 0 4 3-14 0
