დუბლიორთა ტურნირის ოცდამეოთხე ტური
2014 წლის 31 მარტს გაიმართა საქართველოს XXV ეროვნული ჩემპიონატის უმაღლესი ლიგის გუნდების დუბლიორთა ტურნირის ოცდამეოთხე ტურის შეხვედრები. საფეხბურთო კლუბ ”ზესტაფონის” რეზერვისტებმა საკუთარ ბაზაზე მარტვილის ”მერანის” მეორე გუნდს უმასპინძლეს.
ზესტაფონელებმა ასეთი შემადგენლობით იასპარეზეს: მეშველიანი, გელაშვილი, თედ. გრიგალაშვილი, გაგოშიძე, ენდელაძე, აჯურუ (ბარბაქაძე, 65), მარგველაშვილი (იელიჩი, 71), მაკარიძე (კალაჯიშვილი, 60), კაკუშაძე, ეგუტიძე (გოგია, 65), კაპანაძე (კვარაცხელია, 60).
შეხვედრა მასპინძელთა შეტევებით დაიწყო და უკვე 12-ე წუთზე ზუსტი თავურით ბურთი მარტვილელთა კარის ბადეშითორნიკე კაპანაძემ გადაგზავნა. საერთოდ, დღევანდელი მატჩი თორნიკე კაპანაძის ერთგვარ “ბენეფისად” იქცა – 15-ე და 23-ე წუთებზე გატანილი კიდევ ორი გოლის წყალობით ზესტაფონელთა ფორვარდმა “ჰეთ-თრიკი” პირველსავე ტაიმში შეასრულა…
მასპინძლები ამის შემდეგაც განაგრძობდნენ სტუმართა შევიწროვებას და 25-ე წუთზე იმერლებმა მეოთხე გოლი გაიტანეს – “ზესტაფონის” კარგი შეტევა ბექა კაკუშაძის ზუსტი დარტყმით დასრულდა. პირველი ტაიმის მიწურულს (39-ე წუთი) კი მარტვილელთა კარი მეხუთედ ავთანდილ ეგუტიძემ აიღო.
მეორე ტაიმის დაწყებიდან 5 წუთში ანგარიში ისევ შეიცვალა – თავი ისევ თორნიკე კაპანაძემ გამოიჩინა. 52-ე წუთზე სტუმრებმა ანგარიშის “დასველება” მოახერხეს – მიზანს თორნიკე ბარბაქაძის შორეულმა გასროლამ მიაღწია. სათამაშო დროის 1 საათის გასვლის შემდეგ მოედანი დღევანდელი მატჩის გმირმა, თორნიკე კაპანაძემ კი დატოვა, თუმცა მანამ, სანამ შეიცვლებოდა, კერძოდ 55-ე წუთზე, მან თავის დღევანდელ მონაგარს კიდევ ერთი გოლი შემატა და ძალიან იშვიათი ინდივიდუალური მიღწევის – “პენტა-თრიკის”ავტორი გახდა!
იმერელთა გულშემატკივართათვის ძალიან სასიამოვნო ამბავი მოხდა შეხვედრის 71-ე წუთზე – მძიმე ტრავმით გამოწვეული თითქმის 8-თვიანი იძულებითი უქმობის შემდეგ, მოედანს ზესტაფონელთა სერბი ნახევარმცველი იგორ იელიჩი დაუბრუნდა. რაც შეეხება დღევანდელი უხვგოლიანი მატჩის დასკვნით ნაწილს, 81-ე წუთზე ბექა კაკუშაძემ დუბლი შეასრულა და იმერულ-მეგრული დაპირისპირების საბოლოო ანგარიში დააფიქსირა – 8-1.
საფეხბურთო კლუბ ”ზესტაფონის” პრეს-სამსახური
