“ძალიან კარგი მატჩი ჩავატარეთ, ესპანეთზე უკეთესი შანსები გვქონდა” – ზლატანი მარცხის შემდეგ

შვედეთის ეროვნული ნაკრების თავდამსხმელმა ზლატან იბრაჰიმოვიჩმა ესპანეთთან განცდილი მარცხის შემდეგ კომენტარი გააკეთა.

როგორც იცით, მსოფლიოს 2022 წლის ჩემპიონატის შესარჩევი ეტაპის ბოლო ტურში ესპანეთმა შვედეთი საკუთარ მოედანზე მიიღო და 1:0 გაიმარჯვა. B ჯგუფიდან მუნდიალის საგზური სწორედ ესპანელებმა მოიპოვეს, შვედებს კი ფლეი-ოფში თამაში მოუწევთ.

“ძალიან კარგი მატჩი ჩავატარეთ, ძალიან კარგი. შეცდომა დავუშვით, რომელიც მეტოქემ გამოიყენა და გოლი გაგვიტანა. კარგი საგოლე მომენტები გვქონდა, ესპანეთზე უკეთესები. სამწუხაროა, რომ დავმარცხდით. ასეთ გუნდებთან ყველა შანსი უნდა გამოიყენო. რა თქმა უნდა, ყველანი იმედგაცრუებულნი ვართ. დაველოდებით, ვინ შეგვხვდება ფლეი-ოფში, თუმცა იქამდე დიდი დროა. მე ისიც კი არ ვიცი, ფლეი-ოფის დროს ცოცხალი ვიქნები თუ არა”, – ციტირებს იბრაჰიმოვიჩის სიტყვებს fotbollskanalen.se.

შეგახსენებთ, რომ 11 ნოემბერს საქართველოს ნაკრებმა შვედეთი ბათუმში 2:0 დაამარცხა, რითაც იანე ანდერსენის გუნდს საქმე ძალიან გაურთულა.