ედენ აზარი: “მორატამ ახლა ფეხითაც უნდა სცადოს გოლის გატანა”
ლონდონის “ჩელსის” ერთ-ერთმა ლიდერმა, ედენ აზარმა თავისი ახალი თანაგუნდელი შეაფასა, რომელთან თამაშის შანსიც პირველად პრემიერ ლიგის მეოთხე ტურში, “ლესტერ სიტისთან” მატჩში მიეცა.
“თქვენც სწორედ ის დაინახეთ, რაც მე. მორატა ძალიან კარგი ფეხბურთელია, თავით ძალიან ბევრი გოლი გააქვს, მაგრამ ახლა ფეხითაც უნდა სცადოს გატანა. ის უმაღლესი დონის მოთამაშეა, ყველანაირი სიტუაციიდან შეუძლია მეტოქის კარის აღება და როდესაც ამას აკეთებს, ჩვენ ვიგებთ.
ყველაფერთან ერთად, ის კარგ ფორმაშიც არის. ნაკრებისთვის სამი გოლი გაიტანა და იმედი მაქვს, რომ “ჩელსიში” კიდევ უფრო მეტჯერ შეძლებს თავის გამოჩენას.
რაც შემეხება მე, უკვე სრულფასოვნად დავუბრუნდი გუნდს. ბელგიის ნაკრებშიც ვითამაშე, რამაც ჩემს ფორმაზე დადებითად იმოქმედა. მაქსიმალურად ბევრს ვმუშაობ, რათა გუნდს გამოვადგე,” – აცხადებს ედენ აზარი.
