ედენ აზარის “ჩელსიში” დარჩენა ტიბო კურტუაზეა დამოკიდებული
ლონდონის “ჩელსის” ბელგიელმა ლიდერმა და ნახევარმცველმა, ედენ აზარმა “არისტოკრატების” გულში იმედი გააღვივა და მიგვანიშნა, რომ ლონდონში დარჩენისა და კლუბთან კონტრაქტის გახანგრძლივების საკმაოდ რეალური შანსები არსებობს.
როგორც იცით, საკმაოდ დიდი ხანია, რაც აზარს “რეალში” გადასვლას უწინასწარმეტყველებენ. ამ სიტუაციას ხელს ზინედინ ზიდანის ფაქტორიც უწყობს, რომელიც აზარის უდიდესი ფანი გახლავთ.
“დიახ. მაგრამ, ვფიქრობ, ჯერ კურტუამ უნდა გაახანგრძლივოს და შემდეგ მე მოვაწერ ხელს,” – განაცხადა აზარმა, რომელსაც ჰკითხეს, აპირებდა თუ არა კლუბთან ახალი, გრძელვადიანი ხელშეკრულების გაფორმებას.
რაც შეეხება ტიბო კურტუას, ბელგიელი მეკარე ნამდვილად არ ჩქარობს არჩევანის გაკეთებას: “გადაწყვეტილების მიღება ყოველთვის რთულია. თანაც, ვიცი რომ ჩემი ყოფილი მეგობარი გოგონა მადრიდში დაბრუნდა. ეს ფაქტორიც უდიდეს როლს თამაშობს. მზად ვარ ჩემი შვილებისთვის მოვკვდე კიდეც.
ხშირად, როდესაც ისინი მენატრებიან, ვფიქრობ: “ხომ არ დავბრუნდე ესპანეთში?”. სწორედ ამიტომ ვყოყმანობ კლუბთან ახალი კონტრაქტის გაფორმებას.
რა თქმა უნდა, მე და აზარი ერთმანეთის მომავალზე დიდ გავლენას ვახდენთ. ის ამბობს “ჯერ შენ გააფორმე და მერე მე” და მეც ანალოგიურად. ვნახოთ, რა მოხდება,” – აცხადებს ტიბო კურტუა.
