ედინ ჯეკო: “ჩელსის” ინტერესი რეალური და ძალიან სასიამოვნო იყო”
“რომას” ბოსნიელი თავდამსხმელი, ედინ ჯეკო ადასტურებს ცნობებს, რომლის მიხედვითაც, ლონდონის “ჩელსი” მისი ტრანსფერით იყო დაინტერესებული. როგორც იცით, ეს ტრანსფერი ჩაიშალა “ჩელსიმ” საბოლოო ჯამში ჯეკოს ნაცვლად ოლივიე ჟირუ დაიმატა.
“მართალია, რომ ჩვენს შორის გარკვეული სახის მოლაპარაკებები არსებობდა, თუმცა ეს ყველაფერია, რისი თქმაც შემიძლია. “ჩელსი” ის კლუბია, რომელიც ძალიან მომწონს და ბუნებრივია, მათი ინტერესი ჩემდამი ძალიან სასიამოვნო იყო.
ბოლო კვირების მანძილზე ძალიან ბევრს საუბრობდნენ “რომადან” ჩემს წასვლაზე, მაგრამ, როგორც ხედავთ, მე კვლავ აქ ვარ. რომი უკვე ჩემი სახლია და აქ თავს ბედნიერად ვგრძნობ. ჯერჯერობით არსად წასვლას არ ვაპირებ.
ჩემი ორივე შვილი, უნა და დანი რომში დაიბადა და სწორედ აქ ვეზიარე მამობის სიამოვნებას. რომი უკვე ჩემი ცხოვრების განუყოფელი ნაწილია და წასვლას არ ვგეგმავ,” – აცხადებს ჯეკო.
