ელ კლასიკო – მადრიდის “რეალი” მარცხის 5 მიზეზი
სანაკრებო პაუზამდე უკანასკნელიე ვროპული საკლუბო უიქენი მთავარი მოვლენა ესპანური კლასიკო იყო, რომელშიც მადრიდის “რეალი” “ბარსელონასთან” დამარცხდა. გთავაზობთ, ხუთ მიზეზს, რომლის გამოც მადრიდელებმა კატალონიაში წარმატებას ვერ მიაღიეს.
1. მომენტების გამოუყენებლობა
იშვიათია, როდესაც “ბარსელონსა” უბურთოდ ტოვებენ, თუმცა “რეალმა” კვირას მეტოქესთან ამ კომპონენტში ტოლსწორად თამაში შეძლო. მატჩის დიდი ნაწილი თანაბრად მიმდინარეობდა და “ბარსელონამ” მხოლოდ ბოლო წუთებში შეძლო მცირე უპირატესობის მოპოვება ბურთის ფლობაში – (53.2/46.8).
მადრიდელები უფრო ცივსისხლიანები რომ ყოფილიყვნენ და გადამწყვეტ ფაზაში ზუსტად რომ ეთამაშათ, “ბარსელონას” მოგება გაუჭირდებოდა. კატალონიელებმა კი საკუთარი მომენტები უკეთ გამოიყენეს, თუმცა ისიც სათქმელია, რომ ბოლო წუთებში “ბარსამ” რამდენიმე პერსპექტიული შეტევა გააფუჭა.
2. ბეილის სუსტი თამაში
წლის პირველი კლასიკო პრესამ მსოფლიოს ყველაზე ვარსკვლავური შეტევების დაპირისპირებად მონათლა. სამწუხაროდ, ვერც ერთმა და ვერც მეორემ საკუთარი შესაძლებლობების მაქსიმალურად წარმოჩენა ვერ შეძლო. “ბარსელონას” სუსტი რგოლი ნეიმარი იყო, ხოლო “რეალში” თამაში გარეთ ბეილმა ჩააგდო. ესპანურმა Marca-მ უელსელი მატჩის ყველაზე ცუდ მოთამაშედ დაასახელა.
“კამპ ნოუზე” ბეილმა ბურთი 10-ჯერ დაკარგა და კარში მხოლდო ერთხელ დაარტყა. მის მიერ მასპინძელთა კარში გატანილი გოლი კი თამაშგარე მდგომარეობის გამო არ ჩაითვალა. მიუხედავად ასეთი ინერტულობისა, ანჩელოტი ბეილს ბოლომდე ენდო და შეცვლაზე შესვლების ოსტატს, ჩიჩარიტოს შანსი არ მისცა.
3. ყურადღების ნაკლებობა დაცვაში
კლასიკომდე ესპანელი ჟურნალისტები წერდნენ, რომ ანჩელოტის ბარსლეონაში წარმატების მისაღწევად მოედანზე 11 რამოსი დასჭირდებოდა, თუმცა სერხიოს არც თუ ისე დამაჯერებელმა თამაში თითქოს მთელ გუნდს გადაედო და ესპანელი კოლეგების პათოსმაც ორმაგი დატვირთვა მიიღო.
სტატისტიკას თუ ვენდობით ვნახავთ, რომ “რეალმა” “ბარსელონა” მეორე სართულზე დაჩაგრა, თუმცა ერთ-ერთი გოლი კატალონიელებმა სტანდარტის შემდეგ, სწორედ თავური დარტყმით გაიტანეს. მეორე გოლი კი, დანი ალვეშის გრძელი გადაცემით გავიდა. პირველ შემთხვევაში რამოსს მატიე გაექცა, ხოლო მეორე ნახევარში მადრიდელთა უკანახაზელმა სუარესის შეჩერება ვერ შეძლო.
4. ძალის არასწორი განაწილება
მატჩის ბოლო მონაკვეთში “რეალი” გადაღლილი ჩანდა და “ბარსელონაც” გადამწყვეტ უპირატესობას დაეუფლა. როგორც ჩანს მადრიდელებმა ძალის სწორად გადანაწილება ვერ შეძლეს და პირველ ნახევარში მეტოქეს საკმაოდ დიდი ენერგია შეალიეს.
ანჩელოტიმ ბოლოს ნახევარდაცვის გამოცოცხლება ლუკასის ჩართვით სცადა, თუმცა ბრაზილიელი საერთო სურათიდან ამოვარდნილი იყო და იტალიელის ამ ჩანაფიქრმაც არ გაამართლა.
5. მოტივაციის პრობლემა
“რეალის” პრობლემები “კალდერონზე” განცდილი 0:4-ის შემდეგ დაიწყო. პრიმერას უკანასკნელი ოთხი შეხვედრიდან კი მადრიდმა მხოლოდ ერთი, ისიც მოკრძალებულ “ლევანტესთან, მოკრძალებული 2:0-ით მოიგო. ჩემპიონთა ლიგაში “შალკესთან” შეხვედრა კი ყველას კარგად ახსოვს.
შესაძლოა, საქმე იმაშიც იყოს, რომ ნანატრი “დესიმას” შემდეგ მადრიდელები მოტივაციის ნაკლებობას განიცდიან, “ბარსელონას” კი საკუთარი პირველობა კვლავ დასამტკიცებელი აქვს.
