ეროვნული ლიგის ანალიზი – “საბურთალოს” ევროპაზე ლეგიონერები სჭირდება
საქართველოს ჩემპიონი “საბურთალო” ეროვნული ლიგის დაწყებამდე შეკრებას თურქეთში გადის და გია ჭიაბრიშვილის ბიჭები აქტიურად ემზადებიან. როგორც მთავარმა მწვრთნელმა სეზონის დასრულების შემდეგ აღნიშნა, გუნდს ბევრი ფეხბურთელი დატოვებდა და გამორჩეული ლეგიონერებიც მოვიდოდნენ, თუმცა მისი ნათქვამიდან მხოლოდ პირველი შესრულდა სრულყოფილად, ხოლო, ლეგიონერები, გამორჩეული ლეგიონერები პრაქტიკულად არ ჩანს. შევაჯამოთ თბილისელების ტრანსფერები და გავაანალიზოთ, გაძლიერდა თუ უფრო დასუსტდა კლუბი, რომელმაც საქართველოს სახელით ჩემპიონთა ლიგაზე უნდა იასპარეზოს.
მეკარეები
“საბურთალოს” კაპიტანი და გასული სეზონის წარმატების ერთ-ერთი მთავარი შემოქმედი, ლაზარე კუპატაძე კარიერას ლუქსემბურგში გააგრძელებს. წავიდა მე-2 მეკარე ბექა გვარაძეც. კლუბმა მათ ნაცვლად გამოცდილი ომარ მიგინეიშვილი “რუსთავიდან” და 29 წლის უკრაინელი გოლკიპერი “ლუჩიდან”, დენის შელიხოვი დაიმატა. მიგინეიშვილს ზურგს 17 წლიანი კარიერა უმაგრებს, შელიხოვი კი კარიერის ზენიტში ნახევარი მილიონი ღირდა.
მიუხედავად ყველაფრისა, ფაქტია, “საბურთალო” ამ პოზიციაზე გაცილებით შესუსტდა და მიუხედავად კუპატაძის განცხადებული წასვლისა, გუნდმა მას სათანადო შემცვლელი ვერ მოუძებნა.
მცველები
“საბურთალომ” გასულ სეზონში კარი მშრალად 16 შემთხვევაში შეინახა და 36 მატჩში 29 გოლი გაუშვა. გამორჩეული იყო გაგი მარგველაშვილისა და გიორგი რეხვიაშვილის დუეტი, მარცხენა ფლანგზე კი ლუკა ლაკვეხველიანი იდგა.
რეხვიაშვილი ბერძნულ “ლევადიაკოსში” გადავიდა, ხოლო, მარგველაშვილი კაპიტანი გახდა. გუნდში გიორგი თევზაძე დაბრუნდა, რომელიც ლაკვეხველიანის მთავარი კონკურენტი იქნება. გუნდმა “ჩიხურადან” კარგი ცენტრალური მცველი, ლევან კაკუბავა დაიმატა, რომელსაც თამაში საყრდენადაც შეუძლია.
თბილისელები მარჯვენა მცველმა, ნოდარ იაშვილმა დატოვა, თუმცა შეკრებისას ძალიან აქტიურია გრიგოლ ჩაბრაძე და მას მოუწევს მარჯვენა ფლანგის ჩაბარება.
ნახევარმცველები
“საბურთალომ” ზამთრის სატრანსფერო ფანჯრის დროს მხოლოდ ერთი ნახევარმცველი დაიმატა – 2017 წლის ეროვნული ლიგის საუკეთესო ლეგიონერი, ინტერს გი. გი ბოლოს “სამტრედიაში” თამაშობდა და შეტევითი ხაზის გაძლიერება შეუძლია. წავიდა დავით თარგამაძე, რომელმაც 2-წლიანი ტრავმის შემდეგ მეტ-ნაკლებად შეძლო ფეხბურთში დაბრუნება.
ჭიაბრიშვილი კვლავ გორგიაშვილის, ტერას, დიასამიძის და გონსალვეშის იმედზე იქნება. რაც მთავარია, გონსალვეში დარჩა და ჩემპიონმა მისი შენარჩუნება მოახერხა.
თავდამსხმელები
გუნდს დავით ვოლკოვი და დიმიტრი ტატანაშვილი დაემშვიდობნენ. დაბრუნდა ლაშა შინდაგორიძე, ლადო დვალიშვილი და გიორგი კოხრეიძე კვლავ “ერთი უბნელები” არიან, ჭიაბრიშვილმა კი დიდი იმედები გურამ გოშთელიანზე დაამყარა.
სინჯებზე ოგნიენ როლოვიჩი იმყოფება, რომელმაც პანდევის “აკადემიასთან” ითამაშა, თუმცა უგოლოდ. როლოვიჩს Transfermartk-ზე სატრანსფერო ფასი არ ადევს.
შეფასება: საბურთალომ” 7 ფეხბურთელი გადაიბირა და 6 გაუშვა. მხოლოდ 2 ლეგიონერი – ინტერს გი და დენის შელიხოვი. თევზაძე და შინდაგორიძე “საბურთალოში” 1-წლიანი პაუზის შემდეგ დაბრუნდნენ. გუნდი კვლავ ეროვნული ლიგის ჩემპიონობის ერთ-ერთი ფავორიტი იქნება, თუმცა ევროთასებისთვის საკმარისად ნამდვილად არ გაძლიერებულა და ამ შემადგენლობით, ევროპა ლიგაზე ბრძოლაც გაუჭირდება.
