ესპანეთი – საქართველო: სავარაუდო შემადგენლობები, ფაქტები და სტატისტიკა
ამხანაგური მატჩი: ესპანეთი – საქართველო
შეხვედრის ადგილი: მადრიდი; “ხეტაფეს” ალფონსო პერესის სტადიონი
შეხვედრის დრო: სამშაბათი, 7 ივნისი; 22:45 (მატჩის რეპორტაჟს “საზოგადოებრივი მაუწყებლის” პირველი არხი შემოგთავაზებთ)
მთავარი არბიტრი: ვილჰალმურ ტორარინსონი (ისლანდია)
ესპანეთის ნაკრები ევრო-2016-ის წინ ბოლო მატჩს მართავს, ამიტომ მოსალოდნელია, რომ “ხარები” საქართველოსთან დაპირისპირებას სრული სერიოზულობით მოეკიდებიან. მასპინძლები თავიანთი მოტივაციის ამაღლებასა და დამაჯერებლად გამარჯვებას შეეცდებიან, განსაკუთრებით იმის შემდეგ, რაც დელ ბოსკემ რამდენიმე მოულოდნელი გადაწყვეტილება მიიღო და განაცხადს მიღმა ისეთი ვარსკვალვები დატოვა, როგორებიც ფერნანდო ტორესი, დიეგო კოშტა, ხავი მარტინესი და ხუან მატა არიან.
მოტივაციის ნაკლებობა არც ქართველთა ბანაკში უნდა იგრძნობოდეს, რადგან ვლადიმერ ვაისის შეგირდებს ეძლევათ შანსი, რომ სლოვაკეთთან და რუმინეთთან მარცხისა და ჯამში რვა გაშვებული გოლის შემდეგ რეპუტაცია აღიდგინონ. ფრე ევროპის მოქმედ ჩემპიონებთან, უდაოდ, დიდი წარმატება და სტიმული იქნება სტუმრებისთვის, რადგან მათ ბოლოს თბილისში 4-0 სძლიეს გიბრალტარს და მას შემდეგ ექვსი თამაშია არ გაუმარჯვიათ.
ესპანეთის ბოლო 5 მატჩი:
| 01.06.16 | ამხ. | ესპანეთი | სამხრეთ კორეა | 6 : 1 | |
| 29.05.16 | ამხ. | ესპანეთი | ბოსნია | 3 : 1 | |
| 27.03.16 | ამხ. | რუმინეთი | ესპანეთი | 0 : 0 | |
| 24.03.16 | ამხ. | იტალია | ესპანეთი | 1 : 1 | |
| 13.11.15 | ამხ. | ესპანეთი | ინგლისი | 2 : 0 |
საქართველოს ბოლო 5 მატჩი:
| 03.06.16 | ამხ. | რუმინეთი | საქართველო | 5 : 1 | |
| 27.05.16 | ამხ. | სლოვაკეთი | საქართველო | 3 : 1 | |
| 29.03.16 | ამხ. | საქართველო | ყაზახეთი | 1 : 1 | |
| 16.11.15 | ამხ. | ალბანეთი | საქართველო | 2 : 2 | |
| 11.11.15 | ამხ. | ესტონეთი | საქართველო | 3 : 0 |
ურთიერთშეხვედრები:
15-10-2013 – მსოფლიო ჩემპიონატის შესარჩევი: ესპანეთი 2:0 საქართველო (გოლები: ხუან მატა; ალვარო ნეგრედო)
11-09-2012 – მსოფლიო ჩემპიონატის შესარჩევი: საქართველო 0:1 ესპანეთი (გოლი: რობერტო სოლდადო)
ვისენტე დელ ბოსკე: “ალბათ, საქართველოს ნაკრებთან მატჩში ჩვენი მეკარე დავიდ დე ხეა იქნება. შემადგენლობასთან დაკავშირებით გადაწყვეტილებები ჯერ არ მიმიღია. ჩვენ ვიცით, როგორც უნდა ვითამაშოთ, თუმცა მთავარი ისაა, ეს ყველაფერი მოედანზე როგორ გამოგვივა.”
ვლადიმირ ვაისი: “იმედი მაქვს, რომ წინა მატჩებთან შედარებით უკეთესად ვითამაშებთ. საქართველოს ნაკრებში ორი თვეა ვმუშაობთ. ვფიქრობ, წარმატებას რომ მივაღწიოთ, ბევრი უნდა ვიშრომოთ, ახალგაზრდებს კი ყურადღება მივაქციოთ. ესპანური ფეხბურთი ძალიან მომწონს. ჩემი აზრით, ევროპის ჩემპიონატის ფავორიტი სწორედ დელ ბოსკეს გუნდია.”
ესპანელები:
– გამოჯანმრთელდა ალვარო მორატა, რომელმაც გასულ უქმეებზე ვარჯიში ვერ შეძლო და მოსალოდნელია ძირითად შემადგენლობაში ვიხილოთ.
– მცირე ტრავმა აწუხებს დორტმუნდის “ბორუსიას” ცენტრალურ მცველს, მარკ ბარტრას, რომელიც ინდივიდუალურად ვარჯიშობს.
– დელ ბოსკე, სავარაუდოდ, შანსს მისცემს მადრიდის “რეალის” ფორვარდს, ლუკას ვასკესსაც, რომელიც ბევრისათვის მოულოდნელად, საფრანგეთში გაემგზავრება.
ქართველები:
– ვაისს ტრავმირებული ჯაბა კანკავასა და ჯანო ანანიძის სახით დიდი დანაკლისი ექნება.
– ასევე, სავარაუდოდ, თამაშს ვერ შეძლებს ლევან მჭედლიძეც, რომელმაც დაზიანება რუმინეთთან შეხვედრაში მიიღო.
– დიდი ალბათობით, ვაისი მარცხენა მცველის პოზიციაზე ზურაბ ცისკარიძეს დააყენებს, რომელმაც წინა შეხვედრაში, მოედანზე შემოსვლიდან რამდენიმე წუთში საგოლე გადაცემა გააკეთა.
– სავარაუდოდ, ძირითად შემადგენლობას დაუბრუნდება მეკარე ნუკრი რევიშვილი.
– ასევე, მეორე ნახევარში უნდა ველოდოთ ჩეხური “სლავიას” ფლეიმეიკერის, ლევან ყენიას მოედანზე გამოჩენას, რომელმაც სლოვაკეთთან მატჩში გოლი პირადად გამოიმუშავა.
– საქართველოს ნაკრები კონტრ-შეტევებზე ითამაშებს, ამიტომ დიდი ალბათობით, ვაისისაგან ისევ ხუთმცველიან ტაქტიკას უნდა ველოდოთ.
საინტერესო ფაქტები:
– თუ ლუკას ვასკესი მოედანზე გამოვა, ეს იქნება მისი დებიუტი ეროვნულ ნაკრებში.
– “სელტას” შემტევმა, ნოლიტომ ბოლო ორ ამხანაგურ თამაშში 4 გოლის გატანა შეძლო (ბოსნია-ჰერცეგოვინა 3:1 და სამხრეთი კორეა 6:1).
– ესპანელებმა ბოლო ათი მატჩიდან რვა მოიგეს, ხოლო ორი ფრედ ითამაშეს. ასევე 21 გოლის გატანა შეძლეს, საკუთარ კარში კი მხოლოდ სამი მიიღეს.
– ქართველებმა ბოლო შეხვედრიდან ორი მოიგეს, ორი ფრედ დაასრულეს, ხოლო ექვსი წააგეს. ასევე გაუშვეს 21 გოლი, მეტოქის კარი კი მხოლოდ შვიდჯერ დალაშქრეს.
– ივნისიდან სტადიონზე გამოფენილია ,,ხარების” მიერ მოგებული ჯილდოები: 2010 წლის მუნდიალის თასი და 1964, 2008 და 2012 წლების ევროპული ტიტულები.
– საქართველოსთან მადრიდული დაპირისპირების ბილეთები 45-65 ევრო ეღირება.
