ევლოევი ქართველებს: “თქვენი ხალხის მიმართ მხოლოდ პატივისცემა მაქვს”

UFC-ის ინგუშმა მებრძოლმა, მოვსარ ევლოევმა სოციალური ქსელის საშუალებით ქართველებს მიმართა.

როგორც იცით, ევლოევი და ილია თოფურია ერთმანეთს UFC 270-ზე, 23 იანვარს უნდა შეხვედროდნენ, თუმცა ბრძოლა არ შედგა. ქართველი და ინგუში მებრძოლები სოციალურ ქსელში ერთმანეთთან დაპირისპირებას აგრძელებენ, ისინი ერთმანეთის შეურაცხყოფას არ ერიდებიან.

ევლოევის მიმართვა ქართველებს:

“გამარჯობა, გენაცვალე!!! ძვირფასო ქართველებო, ნუ მიიღებთ პირადად, თქვენი ხალხის მიმართ მხოლოდ პატივისცემა მაქვს. საქართველოსა და ინგუშეთს ყოველთვის ძმური ურთიერთობა ჰქონდათ. ჩემი სახლის კარი ნებისმიერი ქართველისთვის ღიაა”, – წერს 27 წლის სპორტსმენი.