ევრა: “ბაიერნი” ფავორიტია, მაგრამ მე მჯერა “იუვენტუსის”

უეფას ჩემპიონთა ლიგის მერვედფინალურ ეტაპზე ტურინის “იუვენტუსი” მიუნხენის “ბაიერნს” დაუპირისპირდება. “ბებერი სინიორას” მცველმა პატრის ევრამ მოახლოებული მატჩის შესახებ ისაუბრა და განაცხადა, რომ ასეთ შეხვედრებში მთავარია ფსიქოლოგიური განწყობა.

“დარწმუნებული ვარ, რომ კარგი შედეგის ჩვენება შეგვიძლია, თუმცა ამისთვის გუნდის ყველა წევრმა თავისი როლი უნდა შეასრულოს. ასევე საჭიროა მხარდაჭერა. მთავარია გონივრულად, პატივისცემითა და შიშის გარეშე თამაში.

ასეთ მატჩებში დიდი მნიშვნელობა ენიჭება ფსიქოლოგიურ მომენტს. მსგავს შეხვედრებში ფეხბურთით უნდა დატკბე. წინააღმდეგ შემთხვევაში, გეგონება, რომ 20-კილოგრამიანი ქურთუკით თამაშობ. “ბაიერნი” ფავორიტია, მაგრამ მე მჯერა ჩემი თანაკლუბელების”, – ციტირებს ევრას სიტყვებს Sky Italia.

მატჩი “იუვენტუსსა” და “ბაიერნს” შორის სამშაბათს, 23 თებერვალს გაიმართება და თბილისის დროით 23:45 საათზე დაიწყება.