ევრა: “რასიზმი განათლების თემაა. რასისტებს უნდა ვესაუბროთ”
“მანჩესტერ იუნაიტედის” ყოფილმა მცველმა პატრის ევრამ ლუის სუარესთან მომხდარი ინციდენტი გაიხსენა. შეგახსენებთ, რომ 2011 წლის ოქტომბერში ურუგვაელ ფეხბურთელს ფრანგი მცველის მიმართ რასისტული შეურაცხყოფის გამო რვამატჩიანი დისკვალიფიკაცია მისცეს.
“სუარესს საკმარისად კარგად არ ვიცნობ, რასისტი რომ ვუწოდო. ვიცი, რომ მან რასისტული გამონათქვამები გამოიყენა, მაგრამ 2015 წლის ჩემპიონთა ლიგის ფინალში ხელი ჩამომართვა და მეც ჩამოვართვი. სიძულვილს გულში არასდროს ჩავიდებ.
თუ გინდათ რასისტად ყოფნა, ეს თქვენი არჩევანია. ნუთუ ეს გაგაბედნიერებთ?! რასისტების დადანაშაულების ნაცვლად მინდა, გავიგო, საიდან ჩნდება რასიზმი. რასისტად არავინ იბადება. ეს განათლების საკითხია. შესაძლოა, რასისტებმა ოდესღაც რაიმე სახის ტრავმა მიიღეს. ჩვენ მათ უნდა ვესაუბროთ.
არ ვფიქრობ, რომ ამ საკითხში წინ დიდ ნაბიჯებს ვდგამთ. ეს იმიტომ ხდება, რომ განათლება გვავიწყდება. ფეხბურთში ამგვარი ინციდენტები ყოველკვირეულად იზრდება. რასისტებს ვადანაშაულებთ და ალბათ, ისინი ამის გამო უფრო აგრესიულები ხდებიან. თუ რასისტი ხარ და გაგრიყავ, შენ არასოდეს შეიცვლები. ვიღაცამ უნდა სცადოს, გაიგოს, რატომ ხარ რასისტი”, – ციტირებს ევრას სიტყვებს Liverpool Echo.
