გატუზო “პარმასთან” მარცხზე: “ნაპოლის” ფეხბურთელებს ფსიქოლოგიური პრობლემები აქვთ”

“ნაპოლის” ახალმა მთავარმა მწვრთნელმა, ჯენარო გატუზომ, სადებიუტო მატჩში “პარმასთან” განცდილი მარცხის (1:2) მიზეზებზე პრესასთან ისაუბრა. შეგახსენებთ, რომ გატუზომ კარლო ანჩელოტი შეცვალა.

“ბოლო დროს 4-3-3 ფორმაციაზე ვმუშაობდით, თუმცა 4-2-4 ტაქტიკაზე გადასვლა მოგვიწია, რამდენადაც თამაში უნდა შემოგვეტრიალებინა. უიღბლობაზე საუბარი არ ღირს, რადგანაც პირველმა ათმა წუთმა ყველაფერი აჩვენა.

ფეხბურთელებს ფსიქოლოგიური პრობლემები აქვთ – “ნაპოლი” მიეჩვია ხანგრძლივ მოუგებელ სერიებს. ეს ფეხბურთელები ჩემპიონობისთვის იბრძოდნენ, ამიტომაც უჭირთ ადაპტაცია მოცემულ ვითარებასთან,” – აცხადებს გატუზო.

იტალიის სერია A-ს 16 ტურში მოპოვებული 21 ქულით “ნეაპოლიტანელები” ამ დროისთვის მერვე პოზიციას იკავებენ და შესაძლოა, ჩამოქვეითდნენ კიდეც.