გეიმერების მთავარი კითხვა: იქნება თუ არა FIFA 20 Google Stadia-ზე?

თარიღი: აპრილი 3, 2019

“გეიმინგის მომავალი არა მოწყობილობა, არამედ ადგილია” – ვიგებთ მსოფლიოს ერთ-ერთი ყველაზე დიდი კომპანიის ახალი პროდუქტის პრომო რეკლამაში. საუბარიას Google-ს ახალ წამოწყებაზე, სახელად Google Stadia-ზე, რომელიც 2019 წლის ზაფხულში გამოვა.


რას წარმოადგენს Google Stadia?


Google Stadia არის ე.წ. ღრუბლისებრი გეიმინგ სერვერი, რომელიც მომხმარებლებს საშუალებას აძლევს დიდ თამაშებზე წვდომა უშუალოდ Google Chrome-ს ბრაუზერის საშუალებით ჰქონდეს. მთავარი აზრი ის გახლავთ, რომ Stadia არ მოითხოვს განსაკუთრებულ მოწყობილობას – მხოლოდ კარგ ინტერნეტს.

ასე რომ, ჰარდვეარის შეზღუდვები წარსულს ჩაბარდება და საკმაოდ სუსტი კომპიუტერითაც კი შევძლებთ 4K რეზოლუციის ვიდეოთამაშით სიამოვნების მიღება, თანაც 60 FPS-ით. Chrome-სთან ერთად, Stadia ისეთ ცნობილ პორტალთანაც იქნება ინტეგრირებული, როგორიცაა Youtube.

მართალია, კონსოლის შეძენა არ დაგვჭირდება, თუმცა Stadia-ს თავისი ჯოისტიკი ექნება, როემლიც მარტში იქნა წარდგენილი. ჯოისტიკი თავის წინამორბედებს წააგავს, თუმცა მათგან განსხვავებით ორი უნიკალური ღილაკი ექნება. აღსანიშნავია ისიც, რომ ლეპტოპში დაწყებული თამაშის გაგრძელება თავისუფლად შეგეძლებათ ტელეფონში ან ტელევიზორში.

რასაკვირველია, უფასო არაფერია. ვარაუდობენ, რომ ამ სერვერით სარგებლობა მომხმარებლებს თვეში დაახლოებით 10-15 ევრო დაუჯდებათ.


იქნება თუ არა FIFA 20 Google Stadia-ზე?


ჯერჯერობით მხოლოდ ისაა ცნობილი, რომ თავდაპირველად Google Stadia მომხმარებლებს მინიმუმ სამ თამაშს შესთავაზებს. FIFA-ს მოყვარულებს პოზიტიურად ფიქრის საშუალებას ის ფაქტი აძლევს, რომ Google-ს აღმასრულებელი დირექტორი FIFA 19-ის დიდი ფანია და უთქვამს კიდეც, რომ ამ თამაშს საკმაოდ ხშირად თამაშობს.

“ძალიან კარგად ვიცით, რომ ნებისმიერი პლატფორმის წარმატების გასაღები მისი კონტენტია. დღეს დეველოპერთა საზოგადოებას ჩვენი იდეა წარვუდგინეთ… გვინდოდა ჩვენი შესაძლებლობები გაგვეცნო და ფიქრი დაეწყოთ, თუ როგორ შეძლებდნენ თავიანთი კრეატიულობისა და გამოცდილების შეზავებას Stadia-სთან ინტეგრირებისთვის,” – აცხადებს Google-ს გეიმინგ დეპარტამენტის მმართველი ფილ ჰარისონი.

Stadia-ს თრეილერმა მიგვანიშნა, რომ სპორტულ თამაშებზეც იქნება აქცენტი გაკეთებული, რაზეც ერთ-ერთი კადრი მეტყველებს, სადააც სტადიონის გვირაბია ნაჩვენები და გაელვებულია კალათბურთისა და ფეხბურთის თამაშის ეპიზოდები.

დაბოლოს, დაზუსტებით ვერ ვიტყვით, თუმცა სავარაუდოა, რომ Stadia EA SPORT-ის მთავარ პროდუქტთან გააფორმებს კონტრაქტს.

მსგავსი სიახლეები