“გენკი” ოქრიაშვილის შესახებ ახალ განცხადებას ავრცელებს
“გენკის” სპორტულმა დირექტორმა გიუნტერ ჯეიკობმა თორნიკე ოქრიაშვილთან და მის ოჯახთან ისაუბა. გადაწყვეტილია, რომ უახლოეს დღეებში ქართველი შემტევი თავის კლუბს დაუბრუნდება.
აღნიშნულ თემასთან დაკავშირებით “გენკმა” ახალი განცხადება გაავრცელა, სადაც ნათქვამია, რომ ფეხბურთელს ბელგიაში გადაბარგების შემდეგ მენტალური ხასიათის პრობლემები ჰქონდა და ის თავს მარტოსულად და დათრგუნულად გრძნობდა, რაც ძირითადად კომუნიკაციის არქონას უკავშირდებოდა.
ოქრიაშვილი ვარჯიშს ინდივიდუალურად აგრძელებს და კლუბში დაბრუნების შემდეგ მეორე გუნდს შეუერთდება. აღსანიშნავია, რომ ბელგიაში თორნიკე დედასთან და ძმასთან ერთად ჩავა. უახლოეს მომავალში კი მათ მისი მეუღლე და შვილიც შეუერთდებიან.
კლუბი და ფეხბურთელი შეთანხმდნენ, რომ ოჯახის დახმარებით და ენის შესწავლის ინტენსიური კურსის წყალობით თორნიკე ჩვეულ ფორმას დაუბრუნდება და “გენკის” იმედებს გაამართლებს. მანამდე კი მოთამაშე მეორე გუნდში დარჩება. მისი კლუბში დაბრუნების შემდეგ გადაწყდება საჭიროა თუ არა რაიმე დამატებითი ზომების მიღება.
ფეხბურთელი და კლუბი შეთანხმდნენ, რომ უახლოეს მომავალში ოქრიაშვილს პრესასთან არანაირი ურთიერთობა არ ექნება. კლუბი ყველა ღონეს იხმარეს, რათა ოქრიაშვილი მის ჩვეულ დონეს დაუბრუნდეს.
შეგახსენებთ, რომ სანაკრებო შეკრების შემდეგ თორნიკე ოქრიაშვილი კლუბში არ გამოცხადდა და თბილისში დაბრუნდა, რის შემდეგაც “გენკის” ხელმძღვანელობამ ფეხბურთელი მეორე გუნდში გადაიყვანა.
