გენო პეტრიაშვილი: “მე დავუშვი შეცდომა ხალიჩაზე, რასაც ვაღიარებ”
საქართველოს თავისუფალი სტილით მოჭიდავეთა ნაკრების წევრმა, გენო პეტრიაშვილმა სოციალურ ქსელში ტოკიოს ოლიმპიურ თამაშებთან დაკავშირებით განცხადება გამოაქვეყნა.
“გამარჯობა ყველას. მე მინდა მადლობა გითხრათ, ჩემო მეგობრებო, ვინც გვიგულშემატკივრეთ და იდექით ჩვენს გვერდით. ჩვენთვის ძალიან მნიშვნელოვანია თქვენი მხარდაჭერა და კიდევ ერთხელ მადლობა. ასევე, მინდა მივულოცო ყველა სპორტსმენს ღირსეული გამარჯვება. ოლიმპიური თამაშები უმაღლესი მწვერვალია ყველა სპორტსმენისთვის, ამიტომ გული მწყდება, რომ ვერ მივაღწიეთ უმაღლეს საფეხურს, მაგრამ ამით არაფერი მთავრდება. მე დავუშვი შეცდომა ხალიჩაზე, რასაც ვაღიარებ და ვიბრძოლებ რომ გამოვასწორო. მალე შევხვდებით”, – ვკითხულობთ განცხადებაში.
შეგახსენებთ, რომ პეტრიაშვილი 125კგ წონითი კატეგორიის ფინალში გაბლ სტივსონთან ბოლო წამებში დამარცხდა და ოლიმპიურ თამაშებზე ვერცხლის მედალს დაეუფლა.
