გიგზი: “ჩემპიონთა ლიგაზე პრემიერლიგას მსოფლიო დონის მხოლოდ ორი მოთამაშე წარმოადგენდა”

“მანჩესტერ იუნაიტედის” ყოფილმა ნახევარმცველმა რაიან გიგზმა განაცხადა, რომ ინგლისის პრემიერლიგაში მსოფლიო დონის ფეხბურთელების მოძებნა უკვე ძალიან რთულია.

“ჩემპიონთა ლიგაზე ინგლისური გუნდები უწინდელივით კარგად ვეღარ გამოდიან. 2005-დან 2012 წლამდე პრემიერლიგის წარმომადგენლები ევროპის მთავარ საკლუბო ტურნირზე ნორმალურად ასპარეზობდნენ, მაგრამ ახლა ის ხარისხი დავკარგეთ.

როგორც ჩანს, საუკეთესო ფეხბურთელებმა სხვაგან მოიყარეს თავი, პრემიერლიგაში კი შედარებით დაბალი დონის მოთამაშეები გამოდიან. ჩემპიონთა ლიგის მიმდინარე გათამაშებაში ინგლისური გუნდების შემადგენლობებში სერხიო აგუეროსა და ალექსის სანჩესის გარდა მსოფლიო დონის ფეხბურთელის პოვნა მიჭირს”, – ციტირებს გიგზის სიტყვებს “ტელეგრაფი”.