გიორგი იანტბელიძე: “ბოდიშს ვიხდით დაუფიქრებელი ნაბიჯის გამო”
საქართველოს თავისუფალი სტილით მოჭიდავეთა ნაკრების მთავარი მწვრთნელი, გიორგი იანტბელიძე სოციალურ ქსელში გავრცელებულ ფოტოსთან დაკავშირებით განცხადებს აქვეყნებს.
ფოტოზე ჩანს, რომ გიორგი იანტბელიძე, გენო პეტრიაშვილი და ზურაბ იაკობაშვილი რუსეთის ნაკრების მწვრთნელ და დე ფაქტო ოსეთის პარლამენტის დეპუტატ ძამბოლატ თედეევთან ერთად არიან. ქართველ მოჭიდავეებს რუსეთის დროშის ფერებში გაფორმებული მაისურები აცვიათ, რომლებზეც თედეევია გამოსახული.
გიორგი იანტბელიძემ სოციალურ ქსელში განცხადება გამოაქვეყნა და ბოდიში მოიხადა.
“მოგესალმებით ყველას. დიდი გულისტკივილით მინდა გამოვეხმაურო სოციალურ ქსელში დღეს გავრცელებულ ფოტოს.
აღნიშნული ფოტო გადაღებულია დაღესტანში, 2018 წლის ევროპის ჩემპიონატზე, სადაც ორგანიზატორებმა გვთხოვეს ჩემპიონატის მაისურის ჩაცმა, რომელზეც გამოსახული იყო ჯაბო თედეევი. ეს მაისურები არის სუვენირი, რომელიც ყველა დიდი საერთაშორისო ტურნირის ატრიბუტია. მსგავსი მაისურები იყო თბილისში კარტოზია-ბალავაძის ტურნირზე და რუსეთის ნაკრების თითქმის ყველა წევრი დადიოდა ვლადიმერ ხინჩეგაშვილის მაისურით. ეს პოლიტიკასთან არ არის არანაირ კავშირში. ძამბოლატ თედეევი ჩვენი მეგობარია. ის ყოველთვის და ყველგან ცდილობს, გვიქომაგოს და თუკი რაიმე პრობლემა დგება, ყოველთვის ცდილობს, იყოს ჩვენი ბიჭების მხარდამჭერი.
მაგრამ სამწუხაროა ფაქტი ისაა, რომ ეს დაკავშირებულია პოლიტიკასთან. მითუმეტეს, ჩვენს მოუშუშებელ ტკივილთან, რუსეთის მიერ ოკუპირებულ სამაჩაბლოსთან.
მერწმუნეთ, ეს ყველაფერი არის დაუფიქრებლობის შედეგი და არა მიზანმიმართული ქმედება. ჩვენ, თავისუფალი სტილით მოჭიდავეთა ნაკრები ყოველთვის ვაფიქსირებთ ჩვენს ურყევ პოზიციას – ვგმობთ რუსეთის აგრესიულ ქმედებებს ჩვენი ქვეყნის მიმართ. განსაკუთრებით მძიმეა ეს ყველაფერი ომის 10 წლისთავზე. მაშინ როცა განსაკუთრებულ პასუხისმგებლობას ვგრძნობთ ჩვენი, თქვენი თავისუფლებისთვის დაღუპული მებრძოლებისადმი.
თავის მართლებას არ ვაპირებთ. ვიხდით ბოდიშს დაუფიქრებელი ნაბიჯის გამო.
მეც და ჩვენი ნაკრების თითოეულ წევრს ისევე შესტკივა გული ჩვენს სამშობლოზე და დაკარგულ ტერიტორიებზე როგორც ყველა ქართველს!” – ვკითხულობთ განცხადებაში.
