იანუზაის “მანჩესტერის” ლეგენდობა სურს
“მანჩესტერ იუნაიტედის” ნახევარმცველი ადნან იანუზაი კლუბიდან წასვლაზე არ ფიქრობს. მეტიც, მას კლუბის ლეგენდობა სურს.
გავრცელებული ინფორმაციის თანახმად, დევიდ მოიესს ბელგიელი ფეხბურთელის “რეალ სოსიედადში” წაყვანა სურდა. 20 წლის ნახევარმცველით ლივერპულის “ევერტონიც” არის დაინტერესებული. “წითელი ეშმაკების” მთავარი მწვრთნელი ლუი ვან გაალი გასულ სეზონში იანუზაის დიდად არ ენდობოდა, თუმცა ახალგაზრდა ფეხბურთელს “ოლდ ტრაფორდიდან” აბარგება არ სურს და საკუთარ თავს ამბიციურ მიზანსაც უსახავს.
ამის შესახებ ბელგიელი ნახევარმცველის აგენტმა დირკ დე ვრიზემ ისაუბრა.
“საუბარი იმაზე, რომ ადნანს კლუბის დატოვება სურს, სრული სისულელეა. იანუზაი “მანჩესტერ იუნაიტედში” თავს კარგად გრძნობს. კლუბი მის გაყიდვას არ აპირებს.
ის ნიჭიერი ბიჭია, უდიდესი პოტენციალი აქვს. ევროპული ფეხბურთის ბევრი გრანდი სთხოვს კონტრაქტის გაფორმებას, თუმცა იგი “მანჩესტერ იუნაიტედში” დარჩება, რათა კლუბის ლეგენდა გახდეს”, – აგენტის სიტყვებს ESPN აქვეყნებს.
