“ინტერს” მესის დამატება უსასყიდლოდ სურს

ავტორიტეტული წამყვანი გამოცემები მილანის “ინტერში” ლიონელ მესის შესაძლო ტრანსფერის შესახებ ინფორმაციის გავრცელებას აგრძელებენ.

“მარკა” წერს, რომ იტალიელები 33 წლის არგენტინელი ფეხბურთელისთვის 260 მილიონ ევროს ამზადებენ. “ნერაძური” მესის ოთხწლიან კონტრაქტს და წელიწადში ჯამაგირის სახით 65 მილიონ ევროს შესთავაზებს, საიდანაც ფეხბურთელი სუფთა სახით 50 მილიონს მიიღებს.

ლეო მესისა და “ბარსელონას” შორის დადებულ მოქმედ შრომით ხელშეკრულებას ვადა მომავალ წელს გაუვა. ფეხბურთელი კონტრაქტის გახანგრძლივებას არ ჩქარობს, “ინტერს” კი მომენტით სარგებლობა სურს. იტალიური კლუბი მზადაა, 2021 წლის ზაფხულამდე დაიცადოს, თავისუფალი აგენტის სტატუსის მქონე მესი უსასყიდლოდ დაიმატოს და დაზოგილი თანხა არგენტინელის სოლიდურ სახელფასო განაკვეთზე მიმართოს.