ტომას მიულერი: “მჯერა, რომ მომდევნო ეტაპზე გავალთ”
მიუხედავად იმისა, რომ გერმანიის ნაკრებს იტალია სატურნირო მატჩში აქამდე არასოდეს დაუმარცხებია, ტომას მიულერს სჯერა, რომ შაბათს გასამართ შეხვედრაში ყველაფერი “ბუნდესნაკრების” სასარგებლოდ გადაწყდება.
შეგახსენებთ, რომ საქმე ეხება ევრო 2016-ის მეოთხედფინალური ეტაპის მატჩს, სადაც ერთმანეთს გერმანიისა და იტალიის ეროვნული ნაკრებები დაუპირისპირდებიან.
ევროპის ჩემპიონატზე გოლების გატანას ვერ ახერხებ. რა ხდება?
“მნიშვნელობა არ აქვს იმ ფაქტს, რომ გოლები ვერ გამაქვს. ტიტულის მოგებას თუ ვერ მოვახერხებთ, არ მინდა, რომ ბომბარდირი გავხდე.”
ეს მხოლოდ უიღბლობის ბრალია?
“ის ორი დარტყმული ძელსა და ხარიხას რომ არ მოხვედროდა და კარში შესულიყო, ამაზე აღარ ისაუბრებდნენ და ვიქნებოდი ფეხბურთელი, რომელსაც ყოველთვის გააქვს გოლი. გოლის გატანისთვის თავს არ მოვიკლავ.”
“იუვენტუსის” კარი გასულ სეზონში ორჯერ დალაშქრე. შეამჩნიე თუ არა იმედგაცრუება ჯანლუიჯი ბუფონის თვალებში?
“ისეთი არაფერი მინახავს, რაც ადრე არ მქონდა ნანახი. გოლი, რომელიც 2-2-ზე, მიუნხენში გავიტანე მაღალ ბურთზე თამაშის შედეგი იყო. მე მაშინვე ფანებისაკენ გავეშურე ისე, რომ ჯიჯისთვის არც შემიხედავს.”
თვლი, რომ “იუვესა” და იტალიის ნაკრების დაცვის გატეხვა შეიძლება?
“რა თქმა უნდა, ყველას დამარცხება შეიძლება. თავისუფლად შეიძლება აჯობო მსოფლიოს საუკეთესო მეკარეს და მსოფლიოს საუკეთესო გუნდს. ასევე შეგიძლია წააგო კიდეც, რაც მოხდა იტალიასთან გამართულ ბოლო მატჩში.”
რამდენად დიდი მნიშვნელობა აქვს შენთვის წარსულს?
“ყურადღების გამახვილება მხოლოდ ციფრებზე არ შეიძლება. თუ შაბათს იტალია გაიმარჯვებს, ხალხი სტატისტიკაზე დაიწყებს საუბარს. მაგრამ ჩვენ კარგ ფორმაში ვართ და მჯერა, რომ მომდევნო ეტაპზე გავალთ.”
როგორ მატჩს ელი?
“დიდებული მატჩი იქნება, რამეთუ ერთმანეთს ორი მაღალი დონის გუნდი დაუპირისპირდება. ორივე ჩვენგანს აქვს კლასი და ორივე ჩვენგანი კომპაქტურია. როდესაც ჩვენ ვარჯიშს ვაკვირდებოდი, მივხვდი, რომ არავისი არ უნდა გვეშინოდეს. მომწონს ის ფაქტი, რომ იტალიელებთან გვიწევს დაპირისპირება.”
რატომ?
“რადგანაც ისინი ნამდვილი სპორტსმენები არიან. მატჩის წინ, ან მატჩის შემდეგ თავისუფლად შეგიძლია მათთან გახუმრება, თუმცა მატჩის მიმდინარეობისას ისინი მსგავსს რამეს არ დაუშვებენ.”
როგორ შეაფასებ მათ ასპარეზობას აქამდე?
“ისინი ესპანელებთან მატჩში უფრო კარგები იყვნენ, ვიდრე ბელგიელებთან. ესპანეთთან გამართული მატჩის პირველ ნახევარში მათ დიდებულად ითამაშეს, ბელგიელებთან მატჩში კი იტალიელებმა მოწინააღმდეგეს შანსების შექმნის უფლება მისცეს. დაცვა არ იყო ისეთივე უნაკლო, როგორიც ხალხს უნდა, რომ იყოს.”
გერმანია ზედმეტად თავდაჯერებული ხომ არ არის, როგორც 2012-ში?
“არა, ჩვენ ვიცით, რომ თავისუფლად შეიძლება დავმარცხდეთ. ვიცით, რომ მათ ჩვენი სახლში გაგზავნა შეუძლიათ, თუმცა თავდაჯერებულობას მაინც ვინარჩუნებთ. ჩვენ წარსულს დიდ ყურადღებას არ ვაქცევთ. ჩვენ შევიცვალეთ.”
მაშინ გერმანელებმა ბალოტელის დუბლს ვერაფრით უპასუხეს. შეძლებს ამჟამინდელი ჯგუფი ქამ-ბექის განხორციელებას?
“არ ვიცი, გოლი ჯერ არ გაგვიშვია. მაშინ ჩვენ მსგავსი გუნდი გვყავდა, თუმცა ადრე შეცდომები დავუშვით.”
რას ფიქრობს “იუვეს” ფეხბურთელებზე, რომლებიც ნაკრების უკანა ხაზს ქმნიან?
“ისინი ერთმანეთს დიდებულად უგებენ. როდესაც ჯიჯის ბურთი აქვს, მან იცის, რომ ბარძალი მარჯვნივ იქნება, ბონუჩი კი ცენტრში. მათ იციან, თუ საიდან მოვა პასი. მაგრამ გოლები “იუვენტუსმაც” გაუშვა ჩემპიონთა ლიგაზე და იტალიის დამარცხებაც შესაძლებელია.”
შენი მომდევნო თავკაცი კარლო ანჩელოტი იქნება, რომელიც იტალიელია. არ ფიქრობ, რომ ის გაბრაზდება, თუ “აძურის” გოლებს გაუტან?
“არა, პირიქით იქნება – უნდა გავიტანო, რათა ვაჩვენო, თუ რამდენად კარგი ვარ.”
