ხუან მატა: “ლუი ვან გაალს საშიშ ადამიანად მივიჩნევდი”

“მანჩესტერ იუნაიტედის” ესპანელმა ნახევარმცელმა, ხუან მატამ, ის პერიოდი გაიხსენა, როდესაც ლუი ვან გაალს პირველად შეხვდა. შეგახსენებთ, რომ ამსტერდამელი სპეციალისტი “ოლდ ტრაფორდზე” 2014-16 წლებში მუშაობდა.

“როდესაც ოთახში შევედი, იქ ვან გაალი, რაიან გიგზი და წითელი ღვინის ბოთლი დამხვდა სამ ჭიქასთან ერთად.

მან სასმელი შემომთავაზა, თუმცა მე უარი ვუთხარი. ერთი ჭიქა ღვინო მიირთვა და მთხოვა, საკუთარი თავი გამეცნო მისთვის. ვუთხარი, რომ ხუანი მერქვა და 26 წლის ვიყავი. მან კი მითხრა – ‘არა, არა. მითხარი როგორი კაცი ხარ. ოჯახი გყავს? რა არის შენთვის ყველაზე მნიშვნელოვანი’.

ამ მომენტიდან ლუი ვან გაალს საშიშ ადამიანად მივიჩნევდი. თუმცა შემდეგ, როდესაც უკეთ გავიცანი, მივხვდი, რომ ძალიან თბილი და კეთილი ადამიანი იყო,” – აცხადებს მატა.