კონტე: “ჩელსიში” მოსვლის დღიდან, ძალიან ბევრი პრობლემის მოგვარება მომიწია”
დღეს პრემიერ ლიგის 37-ე ტურში ლონდონის “ჩელსი” სტუმრად “ვესტ ბრომვიჩ ალბიონს” დაუპირისპირდება. გამარჯვების შემთხვევაში, “ლურჯები” ინგლისის ჩემპიონები გახდებიან.
მატჩის წინ “არისტოკრატთა” მთავარმა მწვრთნელმა, ანტონიო კონტემ პრესკონფერენცია გამართა.
“პირველ რიგში, მინდა ხაზგასმით აღვნიშნო, რომ ამ სეზონის წარმატებულად დაწყება არ იყო ადვილი. გუნდში უამრავი პრობლემა დამხვდა, რომლებიც ყველამ ერთად მოვაგვარეთ. დიახ, ჩვენ ბევრი ბარიერის გადალახვა მოგვიწია. როცა შენ წინა სეზონს მეათე ადგილზე ასრულებ, ეს იმას ნიშნავს, რომ ერთი კი არა, ბევრი პრობლემა გაქვს.”
“როცა იტალიის ეროვნულ ნაკრებში მივედი, მაშინ კიდევ უფრო რთული სიტუაცია იყო. იქედან წამოსვლის შემდეგ, “ჩელსიც” ცუდ დღეში დამხვდა. ორივეგან ბევრი დაბრკოლება გადავლახე. შესაბამისად, მიყვარს ასეთი სიტუაციები, მიყვარს დიდი გამოწვევები.“
“ჩვენ კარგი სეზონი გვაქვს. გვინდა, დასასრულს იგი ფანტასტიკურ სეზონად ვაქციოთ!” – განაცხადა კონტემ.
