კვარაცხელიასთვის ბრძოლაში “ვესტ ჰემი” დაწინაურდა
“ფუტბოლ ინსაიდერის” ინფორმაციით, საქართველოს ნაკრების ნახევარმცველ ხვიჩა კვარაცხელიას დამატებისთვის ბრძოლაში “ვესტ ჰემ იუნაიტედი” დაწინაურდა.
წყაროს თანახმად, ყაზანის “რუბინი” ქართველი ფეხბურთელის სანაცვლოდ 15 მილიონ ევროს ითხოვს, “ჩაქუჩები” კი დასახელებული თანხის გადასახდელად მზად არიან. დევიდ მოიესის გუნდი კვარაცხელიას დამატებას იანვრის სატრანსფერო პერიოდში შეეცდებიან.
ცნობისათვის, 20 წლის ნახევარმცველით “ევერტონი” და “საუთჰემპტონიც” არიან დაინტერესებულნი. დასახელებულ კლუბებს ზამთარში შეტევითი ხაზის გაძლიერება სურთ და სხვადასხვა ვარიანტებს განიხილავენ.
შეგახსენებთ, რომ მანამდე საუბარი იყო “ტოტენჰემ ჰოთსპურში” ან “მილანში” ხვიჩა კვარაცხელიას შესაძლო გადასვლაზე.
ქართველ ფეხბურთელსა და “რუბინს” შორის გაფორმებულ შრომით ხელშეკრულებას ვადა 2024 წლის ზაფხულამდე აქვს. სპეციალიზებული ინტერნეტპორტალი “ტრანსფერმარკტი” კვარაცხელიას სატრანსფერო ღირებულებას 18 მილიონ ევროდ აფასებს.
