“ლესტერი” ჩემპიონთა ლიგის მეოთხედფინალშია (ვიდეო)

უეფას ჩემპიონთა ლიგის მერვედფინალურ ეტაპზე “ლესტერ სიტისა” და “სევილიას” შორის გამართული საპასუხო მატჩი ინგლისელთა გამარჯვებით, ანგარიშით 2:0 დასრულდა.

ანგარიში შეხვედრის 27-ე წუთზე უეს მორგანმა გახსნა. 54-ე წუთზე მარკ ოლბრაიტონმა “მელიების” უპირატესობა გაზარდა. მატჩის 74-ე წუთზე სამირ ნასრი ჯეიმი ვარდის წაეკამათა და თავი თავში დაარტყა, რისთვისაც მეორე ყვითელი ბარათი მიიღო და მოედანი ნაადრევად დატოვა. რიცხობრივ უმცირესობაში დარჩენილ ანდალუსიელებს გოლის გატანის მშვენიერი შანსი მაინც მიეცათ. მე-80 წუთზე “ლესტერის” კარის მიმართულებით პენალტი დაინიშნა, თუმცა სტივენ ნზონზის დარტყმული კასპერ შმეიხელმა მოიგერია.

ორი მატჩის ჯამში “ლესტერმა” “სევილია” 3:2 დაამარცხა და კლუბის არსებობის ისტორიაში ჩემპიონთა ლიგის მეოთხედფინალურ ეტაპზე პირველად გავიდა.

ჩემპიონთა ლიგა
მერვედფინალი (II მატჩი)
“ლესტერ სიტი” — “სევილია” 2:0 (1:0)
გოლები: მორგანი 27′, ოლბრაიტონი 54′.
გამოუყენებელი პენალტი: ნზონზი 80′ (მეკარე).
გაძევება: ნასრი 74′.