ლევან მაისაშვილი: “ანგარიში ამ თამაშის მდგომარეობას არ ასახავს”
საქართველოს მორაგბეთა ნაკრების მთავარმა მწვრთნელმა, ლევან მაისაშვილმა “შემოდგომის ერთა თასზე” უელსთან განცდილი მარცხის (18:0) შემდეგ პრესკონფერენცია გამართა.
კოტე მიქაუტაძის შესახებ:
“კოტეს ნეკნი აქვს დაზიანებული. დაზიანების ხარისხი ჯერ არ ვიცით, სურათს გადაუღებენ და გამოჩნდება.”
უელსთან თამაშის შეფასება:
“საწყენია… გვქონდა კარგი შანსი, თუნდაც ამ მატჩის მოგების. შეგვეძლო შეტევაში უკეთესად გვეთამაშა და ქულები აგვეღო. ყველაზე მეტად საწყენი ისაა, რომ ანგარიში ამ თამაშის მდგომარეობას არ ასახავს. ისევ ვერ ვახერხებთ ჩვენი ასაღები ქულების აღებას. ყველაზე მეტად მაინც იმით ვარ იმედგაცრუებული, რომ შერკინებაში ბევრჯერ დავჯარიმდით. იყო ბევრი კითხვა შერკინებებში დანიშნულ ჯარიმებზე, როდესაც მეტოქის სამი ნომერი აშკარად ვარდებოდა და მსაჯს ამაზე რეაგირება არ ჰქონდა. თუმცა, ფაქტი ერთია – შერკინებაში ბევრჯერ დავჯარიმდით. დაცვის მოლი უკეთესი იყო, ერთხელ შეტევაშიც შევძელით, რომ კარგად წაგვეღო, თუმცა ამით ქულა ვერ ავიღეთ. გვქონდა რამდენიმე სახიფათო შეტევა, რომელიც შეიძლებოდა ქულით დაგვემთავრებინა. ხედავდით, რომ ძალიან ცუდი ამინდი იყო, ბურთი ცურავდა. მთლიანობაში, წინა მატჩთან შედარებით, შეტევაშიც და დაცვაშიც უკეთესი თამაში გამოგვივიდა.”
ჯარიმების კარში დარტყმის შესახებ:
“რამდენჯერმე თვითონ გადაწყვიტეს მოთამაშეებმა, ამაში კი ხელი არ შემიშლია, თავდაჯერებულობისათვის. ასეთი გადაწყვეტილება მიიღეს. არ ვთვლი, რომ ეს დიდი პრობლემაა ან არასწორია.”
შედარება წინა მატჩთან:
“მიუხედავად იმისა, რომ ინგლისის ნაკრებისა და ამ უელსის შედარება არ შეიძლება სიძლიერით, ჩვენი დაცვაში თამაში გაცილებით კარგი იყო. გვქონდა გაცილებით უკეთესი მომენტები, მოლის დაცვა უკეთესად გამოიყურებოდა. პრობლემები ისევ გვრჩება სტატიკურ ფაზებში. თამაშის მართვა ისევ პრობლემად რჩება. თამაშის მართვის კუთხით, დღესაც იყო უკეთესობა, მაგრამ ჯერ მაინც შორს ვართ. ასეთი ტიპის მოწინააღმდეგეებთან თამაშის უკეთესად მართვა ნიშნავს მათ მოედანზე უფრო მეტად ყოფნას და ბურთის ფლობას. პირველ ტაიმში ჩვენ შორის ბურთის ფლობაში სხვაობა არ იყო დიდი, თუმცა მათ მოედნის ფლობაში ჰქონდათ დიდი უპირატესობა. ეს უნდა ვისწავლოთ, სხვანაირად მოგება რთული იქნება.”
ირლანდიასთან გასამართ შეხვედრაზე:
“ირლანდია უელსზე უფრო ძლიერია. ექვსი ერის გუნდებიდან ერთ-ერთი ყველაზე სახიფათო მოწინააღმდეგეა. ჯერ ადრეა იმაზე საუბარი, თუ რას ველოდებით. წინ ერთი კვირა გვაქვს. მწვრთნელები ჩამოვყალიბდებით შემადგენლობაზე. ველოდებით იგივეს, გვეგმავთ იგივეს, რასაც ვგეგმავდით აქამდე – ამ თამაშით კიდევ ერთი ნაბიჯით წინ წავიწიოთ.”
შერკინების პრობლემა, მარცხენა ბურჯის შესახებ, ზურა ჟვანია:
“მე არ ვთვლი, რომ მიშა ნარიაშვილის პრობლემა იყო. ეს იყო სისტემური პრობლემა. მათი სამი ნომერი რამდენჯერმე ჩავარდა. შემადგენლობაში არავის დამატებას არ ვგეგმავთ. ჟვანია კარგია ღია თამაშში, მაგრამ შერკინებაში, დგომში ვერ ვიტყვი, რომ მიშა ნარიაშვილზე უკეთესად დგას და საერთოდ არ ვთვლი, რომ დღეს მიშა ნარიაშვილის პრობლემა იყო. ეს იყო მთლიანად შერკინების, გუნდის პრობლემა.”
