ლევან მაისაშვილი: “ასეთი თამაშები ყოველთვის კარგია, რათა უფრო მეტად გამოვფხიზლდეთ”
საქართველოს მორაგბეთა ნაკრების მთავარმა მწვრთნელმა, ლევან მაისაშვილმა შოტლანდიასთან განცდილი მარცხის (48:7) შემდეგ პრესკონფერენცია გამართა.
“რა თქმა უნდა, კმაყოფილები ვერ ვიქნებით. ველოდებით შეცდომებს, მაგრამ ამდენს არა. პირველივე წუთებში დავუშვით ისეთი შეცდომები, რამაც თამაშის მართვა გამოგვაცალა ხელიდან. მატჩის მიმდინარეობისას ვერ მოვნახეთ ძალები, რომ თამაშის მართვა უკან დაგვებრუნებინა. მეორე ტაიმის დასაწყისში რაღაც ეპიზოდში შევძელით ჩვენი კარნახით წასულიყო თამაში, მაგრამ ამის შემდეგ ისევ დავკარგეთ კონტროლი. ბევრჯერ დავჯარიმდით. ბურთის ფლობა და მოედანი ძალიან ცოტა გვქონდა. შესაბამისად, შეხვედრა ლოგიკური შედეგით დასრულდა.
მეორე ნახევარში, გარკვეულ მონაკვეთში შევძელით, რომ შეგვეტია, მაგრამ ეს დიდი ხნით ვერ მოვახერხეთ. დაგვემთხვა მცირე ტრავმები, ბოლოს ცოტა უდისციპლინობაც. მოლში მეტოქე აშკარად დომინირებდა, მოლი ვერ გავუჩერეთ.
გუნდში ბევრი ცვლილება გვაქვს, ბევრი ახალგაზრდა მოთამაშეა. ვთვლი, რომ პირველი ეტაპისთვის ეს მომენტი მოსალოდნელი იყო, თუმცა მაქვს იმედგაცრუებები, ცოტა მეტს მოველოდი. ყველაფერი წინ გვაქვს. ასეთი თამაშები ყოველთვის კარგია, რათა უფრო მეტად გამოვფხიზლდეთ და განსხვავება ვნახოთ, ერთა თასის მოწინააღმდეგეებსა და პირველი დონის მოწინააღმდეგეებს შორის.
ამ მატჩისათვის მოსამზადებლად მთლიანი შემადგენლობით მხოლოდ ორი ვარჯიში გვქონდა. მიუხედავად იმისა, რომ საქართველოდან ერთი კვირით ადრე წამოვედით, სრული შემადგენლობა ჩვენ გვყავდა ორშაბათს და სამშაბათს. აქედან გამომდინარე, მოლებზე ვარჯიში საკმარისად ვერ მოვასწარით. მოლებში ცუდი თამაშის მეორე მიზეზი ისიცაა, რომ ბევრი ცვლილება გვაქვს, მეორე ხაზში განსაკუთრებით. რა თქმა უნდა, მოლი იყო ჩვენი ძლიერი მხარე, მაგრამ ამაზე სამუშაო გვაქვს. გამომდინარე იქიდან, რომ მეორე ხაზი მთლიანად შეცვლილია და პირველ ხაზშიც ცვლილებები გვქონდა, ლოგიკური შედეგია. მე მგონია, რომ ამ კომპონენტს შემდეგი მატჩებისათვის გამოვასწორებთ, უფრო მეტი დრო გვექნება ამის გამოსასწორებლად. არ ვთვლი, რომ სამომავლოდ ეს საგანგაშო იქნება.
მუდმივი მოლაპარაკება და რთული სიტუაციაა ფრანგულ კლუბებთან მოთამაშეების გამოშვებაზე. ტრავმირებული იყო კოტე მიქაუტაძე და რეაბილიტაციას გადის ახალ გუნდში. იმედს ვიტოვებ, რომ რვა ერისთვის ის გვეყოლება, რადგან ჩვენთვის დიდი ძალაა.
სერიოზული ტრავმა არ ფიქსირდება. არ მგონია, რომ ვინმეს სერიოზული ტრავმა ჰქონდეს. ოთიამ თამაშის გაგრძელება ვეღარ შეძლო, რადგან კუნთი ტკიოდა. გაჭიმულია თუ ნაწილობრივი წყვეტაა, ეს გამოჩნდება სამომავლოდ. ანალოგიურ სიტუაციაში ჭეიშვილიც. გაეჭიმა ფეხის კუნთები და ამიტომ მოგვიწია გაყვანა”, – განაცხადა მაისაშვილმა.
შეგახსენებთ, რომ საქართველოს ნაკრები რვა ერში პირველ შეხვედრას 14 ნოემბერს ინგლისის წინააღმდეგ გამართავს.
