ლევან მაისაშვილი: ეჭვი არ მეპარება, რომ მომდევნო მატჩებს უკეთესად ჩავატარებთ
საქართველოს მორაგბეთა ეროვნული ნაკრების მთავარმა მწვრთნელმა, ლევან მაისაშვილმა ინგლისის ნაკრებთან განცდილი მარცხის (0:40) შემდეგ პრესკონფერენცია გამართა.
“შოტლანდიის თამაშის შემდეგ, შედარება რომ გავაკეთოთ, იყო მომენტები, როცა უკეთესად გამოვიყურებოდით. რაც ყველაზე მთავარია, უფრო მეტად ბრძოლისუნარიანი გუნდი იყო. სამწუხაროა, რომ მაინც ვერ შევძელით თამაშის მართვა ისე, როგორც გვქონდა დაგეგმილი. ეს ინგლისმა ჩვენზე უკეთ შეძლო, რაც ალბათ, ბუნებრივია. 90 პროცენტი დაცვაში ვიყავით, პირველი დონის გუნდებთან მუდმივად ასე გრძელდება და ზუსტად თამაშიდან თამაშამდე უნდა მოვნახოთ იმის გზა, თუ როგორ დავიჭერთ ბალანსს შეტევასა და დაცვას შორის. პირველ ტაიმში ეს ვერ შევძელით, მეორე ნახევარში შედარებით უკეთ გამოგვივიდა, მაგრამ ტექნიკური წუნიდან გამომდინარე, ბევრი შეცდომა დავუშვით. მთლიანობაში უკეთესი იყო, ვიდრე წინა თამაში, მაგრამ ჯერ ის არ არის, რაც გვინდა.
პირველ რიგში, გვაკლია გამოცდილება, გვაკლია კონკურენცია კონკრეტულ პოზიციებზე, ცოტა ჯანი და რა თქმა უნდა, გვაკლია შეთამაშება. ამას ყველაფერს თამაშიდან თამაშამდე გამოვასწორებთ. რაც შეეხება კონკურენციას კონკრეტულ პოზიციებზე, ეს გრძელ ვადაში გადასაწყვეტია. ნამდვილად არ ვედრებით ინგლისს, მაგრამ შეხედეთ, თითოეულ პოზიციაზე დიდი კონკურენცია და ბრძოლაა. კიდევ ერთი კარგი გაკვეთილი მივიღეთ და ბევრი კარგი რამ ვისწავლეთ ამ თამაშიდან. ეს უბრალო დაპირება არაა – ჩვენ გვჯერა, რომ ეს გუნდი თამაშიდან თამაშამდე უფრო გაიზრდება.
თუ ჩვენი ნახევრიდან ფეხით არ დავარტყით, არ ჩავხურეთ, იმათ ნახევარზე არ გადავიტანეთ თამაში და მუდმივად ჩვენი ნახევრიდან ხელით წამოვიღეთ ბურთი, ძალიან რთული იქნება. ინგლისი არის მსოფლიოში ერთ-ერთი საუკეთესო დაცვიდან მოთამაშე გუნდი, რომელიც სიამოვნებას იღებს დაცვაში. მუდმივად ხელით ვერ შევუტევდით. კიდევ უფრო კარგად შევთამაშდებით, დაგვემატებიან მოთამაშეები. ეჭვი არ მეპარება, რომ მომდევნო თამაშებს უკეთესად ჩავატარებთ. გვქონდა რამდენიმე შანსი 22-თან, რაც ვერ გამოვიყენეთ.
სერიოზული ტრავმები არ ჩანს. მცირე ტრავმები არის, მაგრამ არ მგონია ამან გართულება გამოიწვიოს. ხვალ ყველაფერი უკეთ გამოჩნდება, როცა სამედიცინო სტაფი ანალიზს დაგვიდებს”, – განაცხადა მაისაშვილმა.
საქართველოს ნაკრები მორიგ შეხვედრას 21 ნოემბერს, უელსის წინააღმდეგ გამართავს.
