ლევან მაისაშვილი: “ყველას ვურჩევ, თავი დაანებონ გაუგონარი ზღაპრების მოყოლას”
საქართველოს მორაგბეთა ნაკრების მთავარმა მწვრთნელმა, ლევან მაისაშვილმა შემოდგომის ერთა თასზე ირლანდიასთან წაგებული მატჩის (23:10) შემდეგ პრესკონფერენცია გამართა.
“გაირკვევა, როგორი იქნება ბექა გორგაძის მდგომარეობა. მას მუხლი აქვს დაზიანებული. ახლა ნორმალურადაა, ტკივილებმა გაუარა, თუმცა სანამ სურათს არ გადავიღებთ, არ გვეცოდინება, რა სიმძიმისაა ეს დაზიანება. ჩვენს კარგ თამაშს ძალიან აუფერულებს ის ფაქტი, რომ მან ტრავმა მიიღო და ამაზე ძალიან ვწუხვარ.
თამაშამდე ვცდილობდით, რომ ჩვენი სტატიკური ფაზები გამოგვესწორებინა, უფრო გაგვეძლიერებინა და ჩვენი თამაშის მართვა ყოფილიყო უკეთესი. თამამად შემიძლია ვთქვა, რომ ამ მატჩში ჩვენი თამაშის მართვა უკეთესი იყო, მაგრამ ეს არ არის საკმარისი ამ დონის გუნდებთან მოსაგებად. ორივე ლელო მას შემდეგ მივიღეთ, როდესაც ვიყავით მათ მონაკვეთზე, ჩვენი შანსი მარტივად გადავაბარეთ და აღმოვჩნდით ასეთ რთულ სიტუაციაში. ჩვენი მიზანი იყო, რომ როცა ბურთი ჩვენ გვექნებოდა, ის მეტოქისთვის მარტივად არ დაგვეთმო. ამას დრო სჭირდება. ჩვენ გამოვასწორეთ დაცვით მოლში თამაში.
აქ ძალიან ბევრი სკეპტიკოსია, რომელსაც, ალბათ, ახარებს ქართული რაგბის წარუმატებლობა, დასუსტდა თითქოს ჩვენი შერკინება… ყველას ვურჩევ, თავი დაანებონ გაუგონარი ზღაპრების მოყოლას. ამ ბიჭებს თავი დაანებონ. არაფერი არ დასუსტებულა. რთულია თამაში – მსაჯი როგორ შეგხვდება, როგორი განწყობით ხარ, რამდენად მზად ხარ. ძალიან ბევრი ახალგაზრდა მოთამაშე გვყავს და მათ შეთამაშება სჭირდებათ. გვაცადონ იმის კეთება, რასაც ვაკეთებთ.
დღევანდელ მატჩში იყო მომენტი, ჩვენ იმ დროს გავუშვით ხელიდან სადავეები, როდესაც ჩვენ თვითონ უნდა ვყოფილიყავით აქტიურები, მაგრამ ეს ბუნებრივიცაა. ვეთამაშებოდით მსოფლიოს ერთ-ერთ საუკეთესო გუნდს და გარდა იმისა, რომ ჩვენ რაღაცას ვგეგმავთ, ისინიც გეგმავენ და ხელს გვიშლიან. კარგად იცის საზოგადოებამ, რომ ამ გუნდს დღეს ჩვენ წინააღმდეგ დიდი ანგარიშით მოგება ჰქონდა დაგეგმილი. რეალურად, კიდევ გვქონდა რამდენჯერმე ქულის აღების შანსი. რომ არა ჩვენი გამოუცდელობა, შეგვეძლო უფრო სახიფათოები ვყოფილიყავით”, – განაცხადა მაისაშვილმა.
