ლევანდოვსკი: “ბაიერნი” უნდა გაძლიერდეს, ორი წელია დიდი ტრანსფერი არ განგვიხორციელებია”

მიუნხენის “ბაიერნის” პოლონელი ვარსკვლავი, რობერტ ლევანდოვსკი, კლუბის ხელმძღვანელობას სატრანსფერო ფანჯარაზე აქტიურობისკენ მოუწოდებს. შეგახსენებთ, რომ ზაფხულში “ბავარიელებმა’ მხოლოდ ბენჟამინ პავარი, ლუკას ჰერნანდესი და ჟან-ფიეტე არპი დაიმატეს.

“რა თქმა უნდა, ჩვენი შემადგენლობა ოპტიმალურთან ახლოს არ არის – ჩვენ ძალიან ცოტა პროფესიონალი ფეხბურთელი გვყავს. გულწრფელი უნდა ვიყო. რა თქმა უნდა, მცირე დრო კვლავ გვაქვს. არა მარტო მე, სხვა ფეხბურთელებიც ელიან ერთ-ორ კარგ ტრანსფერს.

მეტი ფეხბურთელი გვჭირდება, რათა ვარჯიშისას კონკურენციის დონეც ამაღლდეს. იმედი მაქვს, რომ ხელმძღვანელობა ამაზე სათანადოდ იმუშავებს.

დღევანდელ საფეხბურთო სამყაროში უმაღლეს დონეზე დასარჩენად ძალიან ძლიერი გუნდი უნდა გყავდეს. ჩვენ კი, ორი წელია, რაც დიდი ტრანსფერი არ განგვიხორციელებია,” – აცხადებს ლევანდოვსკი.