ლინეკერი: ყველა დროის საუკეთესო ფეხბურთელი? საკამათოც კი არაა
ვეტერანმა ინგლისელმა ფეხბურთელმა და “ბიბისის” საფეხბურთო მიმომხილველმა, გარი ლინეკერმა მესისა და რონალდუს შედარების შესახებ კვლავაც ისაუბრა.
ლინეკერი მიიჩნევს, რომ მესი ყველა დროის საუკეთესო ფეხბურთელია.
“ჩვეულებრივ ცხოვრებაში ხალხი ტომებადაა დაყოფილი, ასეთივე სიტუაციაა მესი-რონალდუს დაპირისპირებაშიც. ხშირად, ადამიანები არჩევანს იმის მიხედვით აკეთებენ, თუ რომელ კლუბს გულშემატკივრობენ – “ბარსელონა”, “რეალი”, “იუვენტუსი” და ა.შ. ჩემთვის ეს გასაგებია.
მე რონალდუს დიდი ფანი ვარ, მაგრამ როცა ყველა დროის საუკეთესო ფეხბურთელზე ვსაუბრობთ, საკამათოც კი არაა, რომ მესი საუკეთესოა. ეს ჩემი აზრია.
მესის სხვადასხვა დროს დიდებული თანაგუნდელები ჰყავდა. ვინც არ უნდა ყოფილიყო მის გვერდით, მისი საოცარი სტატისტიკა ყველაფერზე მეტყველებს. იმ ადამიანებს, ვისაც მისი არ სჯეროდა, მან არაერთხელ დაუმტკიცა, რომ ცდებოდნენ.
ბოლო სეზონებში, როცა “ბარსელონა” ისეთივე ძლიერი აღარაა, როგორც წინა წლებში, მისი ეფექტურობა კვლავაც კარგად ჩანს. მის გარეშე გუნდს ბევრი პრობლემა ექმნება”, – უთხრა ლინეკერმა “ბიბისის”.
