„ლივერპულის“ გაუარესებული ფინანსური მაჩვენებელი და მომავლის იმედი
![](https://fanebi.com/wp-content/uploads/2014/03/Ian-Ayre.jpg)
„ლივერპულის“ ბოლო ფინანსურ ანგარიშში ნაჩვენებია, რომ კლუბმა 50 მილიონი ფუნტ სტერლინგის ოდენობის დანაკარგი განიცადა, მიუხედავად იმისა, რომ ბრუნვა 206,2 მილიონით გაიზარდა, რაც სარეკორდო მაჩვენებელია. Deloitte Football Money League-ის ავტორიტეტულ რეიტინგში მერსისაიდული გუნდი ბოლო 14 წლის მანძილზე პირველად ვერ მოხვდა საუკეთესო ათეულში, „წითლები“ მე-12 პოზიციაზე არიან.
„ლივერპულის“ აღმასრულებელი დირექტორი იან ეირი თვლის, რომ ჩემპიონთა ლიგის ზონაში მოხვედრა კლუბს ფინანსური მდგომარეობის გაუმჯობესებაში დაეხმარება.
„ვიცით, რატომაც ვართ რეიტინგის მე-12 ადგილზე. მთავარი მიზეზი ის გახლავთ, რომ ჩვენ ევროთასებზე არ ვმონაწილეობთ. გარდა ამისა, სტადიონი არ გვაძლევს ჩვენი მოთხოვნების დაკმაყოფილების საშუალებას.
ყველაფერს ვაკეთებთ იმისთვის, რომ ევროთასებს დავუბრუნდეთ. იმედი გვაქვს, ჩემპიონთა ლიგაზე მოვხვდებით“, – ეირის სიტყვებს Liverpool Echo ციტირებს.
შეგახსენებთ, რომ მერსისაიდულ გუნდს პრემიერლიგის 28-ე ტურის შემდეგ სატურნირო ცხრილის მეორე ადგილი აქვს დაკავებული.
ბექა დოგრაშვილი