“ლივერპულმა” კოუტინიოს შემცვლელი იპოვნა

როგორც მოგეხსენებათ, პრესაში აქტიურად ვრცელდება ინფორმაცია იმის შესახებ, რომ კოუტინიო “ლივერპულს” მალე დატოვებს და კატალონიის “ბარსელონაში” გადაბარგდება, აქედან გამომდინარე ინგლისელები უკვე ფიქრობენ, როგორ ჩაანაცვლონ ბრაზილიელი შემტევი.

Diario Gol-ის ინფორმაციით “ლივერპულის” სამიზნე მადრიდის “რეალისა” და ხორვატიის ნაკრების ნახევარმცველი მატეო კოვაჩიჩია. კლოპი კოვაჩიჩის მიმართ სიმპატიებს არასდროს მალავდა და უკვე კარგახანია მისი ინგლისში ხილვა სურს, ამიტომაც “ლივერპულის” მესვეურები აქტიურად შეეცდებიან მატეოს დათანხმებას. რაც შეეხება თვითონ ხორვატს, მას “რეალში” დიდი სათამაშო პრაქტიკა არ აქვს. მას თანამემამულე მოდრიჩის შემცვლელად მოიაზრებდნენ, თუმცა ჯერჯერობით მას მადრიდელთა ათიანთან კონკურენციის გაწევა უჭირს.

მატეო კოვაჩიჩი “რეალში” “ინტერიდან” 2015 წელს გადმობარგდა. ამ პერიოდში ხორვატმა მადრიდელთა მაისურით 97 მატჩი ჩაატარა, მის აქტივში კი 8 გოლი და 11 საგოლე გადაცემაა.