“ლივერპულმა” ურთულეს შეხვედრაში “შეფილდის” დამარცხება მოახერხა (ვიდეო)
პრემიერ ლიგის მეშვიდე ტური გათამაშების ერთ-ერთი ფავორიტისა და ახლადაღზევებული გუნდების დაპირისპირებამ გახსნა. საუბარია “ლივერპულსა” და “შეფილდ იუნაიტედზე”.
როგორც მოსალოდნელი იყო, შეხვედრა საკამოდ მძიმე ხასიათის გამოდგა. პირველ ტაიმში “ლივერპულმა” რამდენიმე საგოლე მომენტი შექმნა, თუმცა არაფერი გამოვიდა. თავის მხრივ, მასპინძელთა შემტევებიც არ ამბობდნენ უარს “მერსესაიდელთა” დაცვის ეშელონების შეწუხებაზე.
მეორე ტაიმიც მსგავსი სცენარით მიმდინარეობდა. “შეფილდი” აშკარად უფრო გააქტიურებული ჩანდა და გოლის გასატანადაც კი იწევდა, თუმცა მათმა მეკარემ 70-ე წუთზე შეცდომა დაუშვა და ვეინალდუმის დარტყმის შემდეგ ბურთი ფეხებს შორის გაუძვრა. ამან მასპინძელთა იმედებს დაღი დაასვა და მატჩის ბედიც გადაწყვიტა.
ასე რომ, იურგენ კლოპის შეგირდები მიმდინარე სეზონში კვლავაც უდანაკარგოდ მიიწევენ წინ. 7 მატჩში მოპოვებული 21 ქულით “წითლები” პირველები არიან და მომდევნო ტურში “ლესტერს” მიიღებენ, “შეფილდი” კი 8 ქულით მეათეა და “უოტფორდთან” გასვლაზე თამაშისთვის მოემზადება.
