ლუკა მოდრიჩმა ხუთი წლის გოგონას წერილს უპასუხა
მსოფლიო ჩემპიონატის დასრულების შემდეგ ტურნირის ერთ-ერთმა საუკეთესო ფეხბურთელმა ხუთი წლის გულშემატკივრისგან თბილი წერილი მიიღო, რაც უპასუხოდ ვერ დატოვა. წერილის ავტორი სელენა ბუნიაი გახლავთ, რომელიც ლეიკემიით არის დაავადებული.
“საყვარელო ლუკა, ამ წერილის წერაში ჩემი და მეხმარება, რადგანაც მე ჯერ პატარა ვარ და წერა არ ვიცი. მხოლოდ ხუთი წლის ვარ. როდის გვესტუმრები? მინდა პიკნიკზე დაგპატიჟო და შემდეგ ჩვენ გვეწვიო. ძალიან მიყვარხართ ყველანი, თუმცა შენ განსაკუთრებულად. მსოფლიოს საუკეთესო ფეხბურთელი ხარ. ძალიან მიყვარს შენი თამაშის ყურება, მომწონს ბინძურად რომ არ თამაშობ, როგორც ბევრი სხვა. ყვავილს გაჩუქებ. ჩემს დას სუბა და ვრსალკო უყვარს, დედას – ვიდა. მე კი ყველაზე მეტად შენ მიყვარხარ. შენი სელენა” – ვკითხულობთ წერილში.
ლუკას საპასუხო წერილში კი ვკითხულობთ: “ძვირფასო სელენა, მივიღე შენი ლამაზი წერილი, რომელმაც ძალიან გამაბედნიერა. შენ ჩემსა და ნაკრების გამო ძალიან ღელავდი, ჩვენ კი ყველაფერი გავაკეთეთ შენნაირი კეთილი ფანებისთვის. სწორედ თქვენნაირი გულშემატკივრებისთვის ვიბრძვით ბოლომდე. ჩვენ ყოველთვის ვგრძნობთ, რომ თქვენ ჩვენს გვერდით ხართ! სუბამ და შიმემ შენს დას მოკითხვა შემოუთვალეს, ვიდამ – ედას. მე კი საუკეთესო სურვილებით გემშვიდობები. შენი ლუკა მოდრიჩი.”
