მარსელო: “გაგანებივრეთ და თქვენც ფიქრობდით, რომ…”
დღეს ესპანეთის ლა ლიგა სანტანდერის მეჩვიდმეტე ტურის შეხვედრაში მადრიდის “რეალი” კატალონიის “ბარსელონას” საკუთარ მოედანზე დაუპირისპირდა და მეტოქესთან ანგარიშით, 0:3 დამარცხდა.
დაპირისპირების შემდეგ ჟურნალისტებს “ბლანკოსის” ვიცეკაპიტანი, მარსელო ესაუბრა.
“რეალმა” თავისი წარმატებებით ფეხბურთის გულშემატკივარი ძალიან გაანებივრა. ბევრი მათგანი ფიქრობდა, რომ ყველა შეხვედრას მოვიგებდით. თუმცა, ეს სპორტის სახეობაა, სადაც ხან იგებ, ხან აგებ. “ბარსა” იმიტომაა წინ, რომ მათ მეტ შეხვედრაში მოიპოვეს გამარჯვება. რაც შეეხება მათთან არსებულ დიდ დაშორებას, არ ვიცი, რა იქნება მომავალში, თუმცა შრომის მჯერა – არ მჯერა სასწაულების. მონდომებით ყველაფერი შესაძლებელია.”
“პირველ ტაიმში კარგად ვითამაშეთ, მეტოქეს ბურთის ფლობაშიც ვაჯობეთ, მომენტებიც შევქმენით. თუმცა, მეორე ნახევარში ძალიან მოკლე დროში გოლი გავუშვით და თან ფეხბურთელი გავიძევეს. ამას მოჰყვა თერთმეტმეტრიანი და მეორე გოლი. ამის შემდეგ, ნებისმიერისთვის რთულია, ასეთი დონის მეტოქესთან თამაშში დაბრუნდე. “ბარსელონასთან” ასპარეზობა თერთმეტი კაცითაა რთული და ათით ხომ საერთოდ,” – ამბობს მარსელო.
