მატა: „მანჩესტერ იუნაიტედს“ „ბაიერნის“ ბარიერის დაძლევა შეუძლია“

„მანჩესტერ იუნაიტედის“ ნახევარმცველი ხუან მატა თვლის, რომ მის გუნდს ჩემპიონთა ლიგის მეთხედფინალურ ეტაპზე მიუნხენის „ბაიერნის“ ბარიერის დაძლევა შეუძლია.

„ნიუკასლთან“ გამარჯვებამ მიუნხენში გამგზავრებამდე თავდაჯერება და ენერგია შეგვძინა. გუნდს შინიდან, ტელევიზორის წინ მჯდომი დავუჭერ მხარს. მესმის, რომ „ალიანს არენაზე“ თამაში ძალიან რთულია, თუმცა „მანჩესტერ იუნაიტედს“ მომდევნო ეტაპზე გასვლა შეუძლია. ამაში დარწმუნებული ვარ“, – Goal.com-ი ციტირებს მატას სიტყვებს, რომელიც „მანჩესტერ იუნაიტედში“ ლონდონის „ჩელსიდან“ ზამთრის სატრანსფერო პერიოდში გადაბარგდა, ამიტომ ჩემპიონთა ლიგის მიმდინარე გათამაშებაში „წითელი ეშმაკების“ სახელით ასპარეზობის უფლება არ აქვს.

მატჩი „ბაიერნსა“ და „მანჩესტერ იუნაიტედს“ შორის ოთხშაბათს, თბილისის დროით 22:45 საათზე დაიწყება და მას იონას ერიქსონის თავკაცობით შვედ მსაჯთა ბრიგადა განსჯის.

ბექა დოგრაშვილი